April 15-ah India squad puang dawn

ICC Cricket World Cup khel tur India squad chu April 15-ah tihchian a nih tur thu Board of Control for Cricket in India (BCCI) chuan an puang. Cricket thuneitu sang ber ICC-in hun tawp a ruat hma ni riatah an tifel dawn tihna a ni.

BCCI official pakhat chuan, "Squad kan puan hma hian World Cup atan inpuahchah a awlsam zawk dawn," tiin a sawi. India player ṭha te hian Indian Premier League an khel mek a, amaherawhchu chief selector MSK Prasad chuan an player thlan tur an thlan fel thaw khat tawh avangin IPL neih meka an chet dan an thlir tel loh tur thu a sawi.

IPL hi May 12-ah khelh zawh a ni a, World Cup atana an inpuahchahna match hmasa ber hi May 25 hian New Zealand nen an khel ang. India hian March thla khan Australia an mikhual a, he inelna neih zawh hian captain Virat Kohli chuan hmunruak pahnih khat a la tihfel leh a awm thu a sawi a. Hei vang hian batting order palina leh bowler palina tur chu chiang loa ngaih a ni.

India hian June 5 hian World Cup-a an match hmasa berah South Africa an hmachhawn dawn a. Cricket inelna sang berah hian India hi vawi hnih champion tawhin kum 1983 khan Kapil Dev hoin an champion a, kum 2011 khan Sanchin Tendulkar-a hoin an champion leh chauh a ni.