Ronaldo telna Juve leh Ajax inhnehtawk

Ajax-in UEFA Champions League-a record nei ṭha ber Real Madrid an pet thlak hnuah Cristiano Ronaldo telna Juventus nen Nilaini zan khan 1-1 in an inhnehtawk. Quarterfinal second leg hi Turin-ah April 16, Thawhlehni zanah khelh a ni ang.

Johan Cruyff Arena-ah Ronaldo tauh luh hmangin Italian champion-in first half tawp hma hretin hma an hruai a, Ajax-in second half ṭan chiahah David Neres hmangin an sut a, goal dang a lut tawh lo.

Mr Champions League

Massimiliano Allegri-a'n malpui hliam vanga match li khel tawh lo Cristiano Ronaldo chu bul a ṭantir a, Portugal captain inlan hnuhnun ber chu Atletico Madrid lama hattrick a siam ṭum kha a ni.

Ronaldo hian Europe inelna sang berah hian nomawi vawi nga a chawi tawh a, Ajax lakah hian minute 45-naah Joao Cancelo cross ball chu tlu chungin tauh a lut. Champions League bikah Ronaldo hian goal 125 a khung tawh a, Ajax lakah hian goal riat a khungna a ni a, kum 34 mi a ni tawh chungin a la vul hle.

Dutch defender Matthijs de Ligt chuan, "Ronaldo hian theihna sang tak a nei a, box chhungah a hlauhawm takzet. Hmun awl chhe te a hmuh pawhin a hmang ṭangkai thei a, player pahnih inkarah chak taka tlanin a rawn tauh lut," tiin an lama goal khungtu chu a fak hle.

Ajax an thiam

Juventus-in goal khat neiin halftime an hmang a, second half ṭan aṭanga second 40-na lekah goal an chhuah thung.

Ajax forward David Neres chuan vei lam sir aṭanga ball lalutin Juventus player pathumin an hual chungin petna tur khawp a insiam thei a, keeper Wojciech Szczesny dan theih loin goal kilah a hlai lut.

Kum 22 mi Neres hi Sao Paulo aṭanga inzir chhuak a ni a, Ajax-ah hmun pawimawh changin Brazil tan pawh ṭum khat a inlan tawh a ni.

Real Madrid hnehtu Ajax-in goal venhim ngawt an tum lo a, an nawr ngam a, Argentine midfielder Nicolas Tagliafico ball pet chuan keeper Szczesny tan hna a siam pha a. Southampton player hlui Dusan Tadic leh Moroccan midfielder Hakim Ziyech te chu Juventus tlarhnung tan an hnawk a, kum 19 mi Jurgen Ekkelenkamp pawhin chance ṭha bik a hlah bawk.

Ajax hi Italian champion chelh tur khawpin an khel ṭha a, chutihrualin Juventus vanneih ṭum ni se substitute Douglas Costa hmangin chak thei an ni a. Bayern Munich forward hlui hian minute 85-naah ṭha taka a lakluh hnuah goal ban a pet per a, 1-1 in inkhel a tawp.

Barca player tur chu

Barcelona-in team din thar tura pound maktaduai 65 zeta Frenkie de Jong an lakluh khan mak tih a hlawh a, Ajax midfielder hian Juventus lakah a thiam zia a pholang. Kum 21 leh ni 333-a upa De Jong hian vawi 117 zet ball a khawih a, Champions League quarterfinal-ah kum 2010-a Sergio Busquets-a'n Inter Milan a hmachhawn hnua hetiang zat ball khawih thei naupang ber a ni.

De Jong hian pass 98 neiin a pass dik percentage chu 92% a ni a, hlawhtling takin vawi ruk a tackle a, pass ṭha bik vawi hnih neiin 'world class midfielder' a nih zia a pholang. Dutch midfielder hi Netherlands tan pawh vawi sarih a khel tawh a, mual chhungah 'conductor' niin Ajax khelh dan 'tempo' siamtu ber a ni a, pressure sangah ball tih muan hun leh tih chak hun a hriat avangin fak a hlawh hle.

Engtin zel?

Ajax coach coach Erik Ten Hag chuan, "1-1 hi kan result duh dan chu a ni hauh lo. Amaherawhchu Real Madrid nen khan first leg-ah 2-1 in kan chak lo a, chuvangin beisei tur a awm," tiin semifinal luh a la inbeisei hle. Erik chuan sawi chhunzawmin, "Midfield-a kan khelh dan kha chu a rang hret a, thil ṭha tak chu ni lo mah se an khelh dan ngaiin ka khelh tlang tir a, kan khingpuite kha an buai phah reng a ni," tiin huai taka an nawr chuan awmzia a neih thu a sawi.

Ajax hian second leg-ah midfielder pawimawh Tagliafico chu hrem vangin an chhawr thei dawn lo a, khualmuala khel tur an nih bawk avangin hmabak a hau tak sawt ang.

Juve coach Massimiliano Allegri chuan, "Ajax an ṭha em em a, hmun awl kan siam loh pawhin ball kengtute an talbuai lo. Goal nawr kawngah erawh kha aia ṭha zawk khan kan khel thei a, kan goal venhim dan erawh a ṭha hle," tiin an khingpuite khelh ṭhat thu a sawi.

UCL - Quarterfinals
First Leg
April 9, Thawhlehni
Tottenham 1 - 0 Manchester City
TOT : Son Heung-min 78'

Liverpool 2 - 0 FC Porto
LIV : Naby Keita 5'; Roberto Firmino 26'

April 10, Nilaini
Ajax 1 - 1 Juventus
AJA : David Neres 46'
JUV : Cristiano Ronaldo 45'

Manchester United 0 - 1 Barcelona
BAR : Luke Shaw 12' (OG)

Second Leg
April 16, Thawhlehni Zan
Juventus 12:30 AM Ajax
Barcelona 12:30 AM Manchester United

April 17, Nilaini Zan
Manchester City 12:30 AM Tottenham
FC Porto 12:30 AM Liverpool