Liverpool & Premier League nomawi - Aw, kar a hla!

Kum 1990 chu hmanlai tia sawi theih a ni tawh a, he thuziak chhiar zingah ngei pawh hian 1990-a piang an awm nual ang a, kawppui an la neih loh chuan nula/tlangval senior ni turin kum tam an mamawh tawh lo tihna a ni!

Ni e, kum 1990 khan Liverpool fan-ten, "League champion kan ni e," tiin hla an sa, hemi hnuah erawh he hla hi an sa leh rih tawh lo. Vawiina Reds fans tam tak ten league champion an la lawm ve lo. Kum 1990-ah kha chuan Jurgen Klopp pawh kum 22 mi chauh niin German second division club Mainz chuan an striker ni turin an lalut a, Sunderland khawpuiah tuna Liverpool captain Jordan Henderson hi a piang ve chiah bawk.

Kha leh chen kha Liverpool fan-ten league nomawi duhin an thlir ṭhin a, an beisei erawh a thleng thei meuh lo. History keu let chuan 1972-73 leh 1989-90 inkarah ringawt khan Reds-in league nomawi chawi theih vawi 18-ah vawi 11 an chawi!Chu mai a ni lo. Hetih chhung zawng hian European Cup (4), UEFA Cup (2), FA Cup (3) leh League Cup (4) te an chawi tel bawk a, English football-ah hnim hnaitu nei loin an chungnung fal nalh.

Tunah erawh league nomawi chawi loh chin ringawt pawh kum 29 a liam ta - beiseina thar erawh a in mung chho mek. Jurgen Klopp hnuaiah Reds an vul a, Premier League-ah match nga chauh khelh tur nei tawh chungin hma an hruai mek. Kha leh chen Liverpool ṭan a, nomawi an chawi theih loh lai pawha phatsan ve ngai lote tan chuan thin phut dup dup hun a ni a, zamna rilru awm hauh loa match tin en pawh a harsa tawh ang.

Voice of Anfield

Liverpool khelmual Anfield-a thupuangtu hna a thawh ṭan tirh khan George Sephton chu kum 25 mi chauh a la ni a, tunah erawh kum 73 lai a ni ta.

Voice of Anfield tia an hriat Sephton chuan, "Liverpool fans zingah league nomawi kan chawi hnuhnun bera la piang lo an tam lutuk ringawt pawh hi a dik thei lo. Announcer anga ka thawhpui ṭhin Phil Easton chu kum 10 liam ta khan a thi tawh a, club chairman hlui John Smith pawh 1995 khan a thi tawh.

"Kum 1990-a Alan Hansen-a'n league nomawi a chawi lai khan an damchhung zawnga chutiang an hmuh leh tawh ngai loh tur thu hrilh ni ila, mi a enin min en ang. "Anfield announcer hna ka thawh hmasak kum 20 chhung kha chuan league nomawi chawi kha hna bera kan neih a ni. Tunah erawh vawi khat chiah tal, ka dam lai ngeia kan champion leh hmel hmuh hi ka duh a ni.

"Nomawi hi kan chawi leh a nih ngat chuan Anfield-ah khum nen ka input luh a ngai ngei dawn - a chhan chu maw ka haw lawk thei dawn lo," tiin an tana Premier League nomawi hlut zia a sawi.

A hmun ṭhu!

Paul Tremarco chuan Anfield aṭanga hnai teah The Arkles Pub tih a nei a, Liverpool fan ruhkawl niin kum 45 chhung chu season ticket holder a ni tawh! Tremarco chuan, "Nitin ka parda ka hawn apiangin Anfield a lo lang ṭhin a, Liverpool ka hmangaih em avangin ka hnathawh hi ka tan chuan duhthusam a ni.

"Champions League-ah quarterfinal kan lut tawh a ni mai thei a, mahse mi zawng zawngin nomawi kan chawi duh ber chu Premier League a ni. Kum 20 ka tlin chhoh vel lai kha chuan kan champion dawn em, tih ai chuan kan hnuai chiaha awm tur hi kan ngaihven ṭhin zawk.

"Second division aṭanga kan inhlankai hnu kum hnihah, 1964-a Bill Shankly hoa nomawi kan chawi kha a ropui takzet a, kum 1977-a European Cup a vawi khat nana kan chawi pawh kha ropui tak a ni. "Premier League-ah hian nomawi kan chawi a nih chuan heng hlawhtlinna te nen hian khaikhin theih a ni a, a ropui zawk hial mai thei bawk," a ti!

Liverpool khaw mi

Kum 45 mi Tage Herstad chu Norway aṭangin kum 2002 khan Liverpool khawpuiah a pem lut a, Hotel Tia neiin Liverpool theme nena inmil vekin a dawr pawh a cheibawlin a kalpui. Herstad chuan, "Norway khawpui pakhat Floro aṭanga lokal ka ni a, khawpui nuam tak ni mah se Liverpool Football Club an nei ve miah lo a ni," a ti!

Reds fan ruhkawl chuan, "Newcastle lakah City 1-2 in an tlawm tih ka hriat rual khan ka nuam ti lutuk kha ka damlo ringawt mai a ni! "Nomawi kan chawi ngei ang tih hi beiseina nen ka thlir mek a, kum 29 hnuah hian kan champion leh a nih ngat chuan engemaw tak chu a thleng chiang ang," tiin a sawi.

Hman ata tawh!

1976-77 season chhut let ila, hun rei tak, kum tam tak liam a ni tawh - mahse kha season aṭang khan Les Lawson chuan Anfield-a Liverpool inkhel en loh a la nei lo!

Liverpool supporters' club, Merseyside branch-a an hotupa Lawson chuan, "League nomawi kan chawi lohna a rei ta a, Reds fan-te pawhin he nomawi ngei hi chawi an duh leh tawh a ni. "Reds-in league nomawi kan chawi lai la hmu ngai reng reng lote tan a hlu lehzual dawn a, hetihrual hian Manchester City nena inel kan nih avangin a harsa a ni.

"League champion kha kan ngai neih hman tawh a, FA Cup zawk chawi duha cup competition-a insawrbing a ṭulzia fan-ten an sawite pawh kha ka la hre reng a ni," a ti a, Reds-in English football an thunun lai a ngai hle.

The Anfield Wrap

Liverpool fans zingah Reds chanchin thehdarh a, podcast lam buaipui ṭhin The Anfield Wrap neitupa chu Andy Heaton a ni a, ani hi Liverpool hrechiang ber pawl a ni. Heaton chuan, "Kum 1988 aṭang khan ka pa nen season ticket kan nei tawh a, league-a Liverpool an champion hnuhnun ber ṭum khan kum 11 chauh ka la ni.

"Nipuiah khua a lum a, thlasikah khua a vawt ṭhin tih a chian tluk zetin May emaw April a lo inherchhuah chuan Liverpool an champion dawn tih kha a chiang ṭhin. "Rei tak kan reh hnuah thil a danglam leh ta a, kan paltlang zozai en phei chuan a lawmawm a ni. Champion ta ila, awih ka harsat tur zia hi ka suangtuah thiam lo zawk," a ti a, a phur hle.