Shanghai-ah F1 intlansiak vawi 1000-na
Car intlansiakna ropui leh ngaihhlut hlawh ber Formula 1 chuan tun kar tawp hian bung thar a kai dawn. Pathianni chhun dar 11:40 hian 2019 Chinese Grand Prix chu Shanghai International Circuit-ah tlan a ni dawn a, he intlansiak hi F1 inelna an neih vawi 1000-na tur chiah a ni ang.
May 13, 1950 khan Silverstone-ah Formula 1 World Championship Grand Prix hmasa ber neih a ni a, kum 69 a liam leh meuh chuan mellung pawimawh leh hlu bik chu a tawng dawn a ni.
Driver leh Team
Intlansiak an neih tawh 999 aṭang hian driver hrang 105 ten hnehna an chang tawh a, heng driver zawng zawng hi ram hrang 23 aṭanga inlan an ni a, an zinga driver 33 chiahin Grand Prix vawi 10-ah hnehna an chang.
Michael Schumacher chu sulhnu nei ṭha ber a ni a, F1 legend hian vawi 91 ngawt hnehna changin amah hnaih bertu Lewis Hamilton aiin vawi 17 zetin hnehna a chang hnem zawk.
Inelna neih ṭan kum 1950-a intlansiak hmasa bera hnehna changtu American driver Johnnie Parsons chu vawi khat chiah hnehna chang thei driver 31 zinga mi a ni a, Grand Prix vawi khat chiaha chak thei hnuhnung ber chu 2012 Spanish Grand Prix chauha hnehna changtu Pastor Maldonado kha a ni.
Team 34 ten hnehna an chang tawh a, an zingah hian Ferrari, McLaren, Williams, Mercedes leh Lotus te chuan record nei ṭha falin team panga ten hnehna an chan tawh zat belhkhawm chu vawi 701 zet a tling.
Ferrari beiseina
Tun season bikah intlansiak vawi hnih an hmachhawn tawh a, hengah hian world champion vawi li ni tawh Sebastian Vettel chuan beisei a phak lo. Driver championship hmahruaitu Mercedes driver Valtteri Bottas a phak lohna chu point 22 a ni nghal der tawh.
Season hmasa khan Ferrari hian car an nei chak bera ngaih a ni a, tun season-ah pawh pre season an neih lai kha chuan car tlan chak ber an ni. Mahse, inelna takah erawh beisei angin an tlan chhuak lo. Nikum ang thoin driver ten beisei an pha lo a, chutihrualin Bahrain GP-a Charles Leclerc-a pakhatna nih loh chhan erawh 'engine' lama harsatna a ni thung.
Ferrari driver Vettel chuan, "Kar tawp hlimawm tak kan hman theih ngei ka beisei, a bul ṭanna fuh lo deuh mah se rang takin kan insiamṭhat ka ring. Kan tan mai ni loin F1 pumpui tan hun hlimawm bik a ni dawn a, he huna hnehna changtu nih theih chu driver leh team tin duhthusam vek a ni," tiin a sawi.
Sanghai lamah
Kum 2004 khan Formula 1 chuan Grand Prix thar pahnih a nei a, chung chu Shanghai International Circuit-a an tlan Chinese GP leh Bahrain GP te an ni - anni pahnih hian tluang takin car inthlansiakna lian hi an la thlen chhunzawm zel.
Shanghai International Circuit hi 5.451km a thui niin vawi 56 an tlankual ṭhin a, a hawnna neih kum hian Michael Schumacher chuan 1:32.238 chhunga lap khat tlan chhuakin tun thlengin lap khat tlan zo tura hun hmang rei lo ber a la ni chhunzawm zel.
Nikum khan Vettel-a'n pole position aṭangin intlansiak bul a ṭan a, mahse German tlangval a chet fuh tawk loh avangin pariatnaah thleng hramin - Red Bull car khalhtu Daniel Ricciardo chu pakhatna a ni. Kuminah hian Vettel hi rinkai a la ni chhunzawm tho a, amaherawhchu Chinese GP-a vawi nga chak tawh Hamilton chu mipui mit fukna ber a ni ang.