Tennis tan hun ropui a ni - Cahill

Australian tennis coach Darren Cahill chuan tunlaia player awm mek te chu an ropui a tih thu a sawi a, tennis khawvelah chuan hun ropui bera chhal ngam tawng tute an nih thu a sawi.

Roger Federer, Rafael Nadal leh Novak Djokovic ten mipa inelna bikah record hrang hrang an siam chho mek a, hmeichhe huangah pawh Serena Williams chu khawvela record ropui tak tak awmsa thai­chhe chho mektu a ni bawk.

Kum 53 mi Cahill chuan, "Player tinin ropui hunlai an nei vek a, an vanglaia player ṭha dang an lo awm ve bawk chuan an ropuina tur ang an thleng pha ṭhin lo. Mahse, player ṭha dang nena an inel a nih chuan boruak a sangin a hmuhnawm phah a, mipuiin an hlut hle bawk.

"Federer leh Nadal inkhel a nih tawh chuan khawvelin a en châk a, a hnuah Djokovic a rawn lan leh pawhin en châkawm tak a la ni tho. Heng player pathum ten vanglai an hmang rual hi chu tennis khawvelah a aia ropui a awm thei tawh chuang lo ang," a ti.

Cahill hi tennis player ṭhin a ni a, Grand Slam nomawi chawi chiah lo mah se 1989 khan Australian Open final a lut. Inkhelh a chawlhsan hnuah coaching a luhchilh - Andre Agassi chu a player enkawl langsar hmasa niin; a hnu lamah Andy Murray, Ana Ivanovic, Fernando Verdasco, Daniela Hantuchova, Sorana Cîrstea leh Simona Halep te a thawhpui leh tawh a ni.

Australian tennis coach chuan sawi zawmin, "Player chhuak thar ṭha tak tak an awm zel. Amaherawhchu, Federer, Nadal leh Djokovic te angin an rilru a paukhauh tawk lo deuh niin ka hria, hlawhtling tur chuan theihna neih san ngawt a tawk lo a, huaisen bakah kan elpuite aia chungnung zawk nih a ngai," a ti.