Champions League Quarterfinal First Leg Old Trafford-ah Barcelona an chak

Nilaini zan khan Barcelona chuan Old Trafford-ah 1-0 in hnehna an chang a, goal awmchhun hi Manchester United defender Luke Shaw-a'n an lama a tihluh a ni.

Ole Gunnar Solskjaer hoten quarterfinal thleng turin Paris St-Germain lakah thilmak an thlentir a, semifinal-a Liverpool emaw FC Porto chak zawk hmachhawn tur pawhin 'thilmak' dang an mamawh ang.

Tiki Taka

Barcelona-in minute 12-naa goal an khung dawn hian second 194 zet ball an inpe kual a, Catalan club player 11-in ball an khawih vek. United defender hlui Gerard Pique aṭanga inṭanin a tawp khartu Luis Suarez-a ball tauh chu Shaw-a'n a lamah a tilut.

Hemi inkarah hian Chris Smalling chuan dan per ve zawk a nei a, Barca tana bul ṭan keeper Andre Ter Stegen, Ivan Rakitic, Sergio Busquets, Arthur Melo, Jordi Alba, Philippe Coutinho, Lionel Messi, Nelson Semedo leh Clément Lenglet ten ball an khawih vek.

United an khel ṭha

Norwegian manager Solskjaer-a'n fimkhur takin player a thlang a, tlar hmaah Marcus Rashford leh Romelu Lukaku thlang mah se hemi thlawp tura awm zingah Paul Pogba tih loh chu goal venhim lam thiam zawk an ni hlawm.

Midfield laia Pogba thlawp turin Fred leh Scott Mc Tominay te an awm a, Diogo Dalot pawh mual sir aṭanga nawr tura dah a ni. United hian goal zawnah vawi khat mah an pet lo chungin goal khung theihna tur erawh a nei a, Rashford leh Dalot ten hun ṭha an bawhpelh.

United player te an thawkrim a, Barcelona goal nawr hlauhawm tur an dang chat thei a. Chutihrualin player ṭha bik Messi, Suarez leh Coutinho te erawh chuan vawi khat ṭheuh chance ṭha an hlah. Argentine forward Messi hi United player-ten tharum nen an hnaih chilh zel avangin a che hlei thei lo.

Beisei tur a awm

Manchester United manager Ole Gunnar Solskjaer chuan, "Team ropui tak kan hmachhawn a, a harsa a ni. Goal khung tumin kan zin chhuak ang a, kan khung theih kan inring bawk. PSG laka hnehna kan chan khan inrintawkna nasa tak min pe a ni," tiin beisei an la neih thu a sawi.

Barcelona hian an mualah Champions League bikah goal hnih chiah an la chhuah a, Manchester United hian khualmualah goal kua an khung a, statistics hian second leg en a tichâkawm hle.

Catalan club boss Ernesto Valverde chuan, "Paris-a an thil tih kha kan hre tlang vek a, chuvangin anni hi tla tawh anga sawi theih an ni lo. Football hi chu a mak ang reng a, eng pawh hi a thleng thei a. Goal khat chauh hi chuan engmah a la sawifiah lo," tiin inkhel thunun chungin chak mah se a la ṭawng fimkhur hle.