India chakna Mizo nula Siami

India hmeichhe hockey sawi rualin Lalremsiami Hmar hming sawi hmaih theih a ni ta lo. Mizo nula hian Malaysia lakah goal pawimawh tak khungin India hi 1-0 in hnehna a chanpui.

Malaysia-a tour nei lai India hian Nilaini zan khan an match ngana an khel a, Kuala Lumpur, Malaysia-ah ram pahnih inkhel tawk viau mah se minute 55-naah Siami hian goal awmchhun a khung.

India leh Malaysia hian vawi ruk an inkhel dawn a, India hi 4-0 in hma an hruai mek a, ṭum khat an inhnehtawk. An match hmasa pahnihah 3-0 in hnehna an chang a, 5-0 a an chak tawh bakah an intawn hnuhnungah 4-4 in an inhnehtawk. Siami telna India hi 1-0 a an chak leh avangin an tour neihnaah an chungnung hle. Vawiin tlai dar 5:35 hian an match hnuhnung ber an khel leh ang.

Kolasib nula hi Malaysia-ah hian a khel ṭha thei hle. Siami hian match an khelh tawh zawng zawngah goal khung vekin India innghahna pawimawh berte zinga mi a ni a, goal nga a khung tawh a ni.

India striker Siami chuan, "Pathian malsawmna ka dawng, coach-in ka chungah rinna a nghat ngam a, min rin ang takin ka khel chhuak thei hi ka lawm takzet. Mizo mipui tam takin min ṭawngṭai pui reng tih ka hria, kan ram tan theihtawp chhuahin ka bei chhunzawm zel dawn a ni," tiin Vanglaini a hrilh.

Thenzawl Hockey Training Centre aṭanga inzir chhuak Siami hi kum 17 mi chauh a nih lai aṭangin India tan a khel phak a, nikum khan Commonwealth Games-ah squad player zinga naupang ber nichungin a feh chhuak tawh. 2017 khan Asia Cup-ah India hi champion puiin 2018 Youth Olympic Games-ah khan a telna team chuan silver medal an vaw chhuak tawh bawk a ni.