Napoli lakah Arsenal chungnung

Arsenal chuan inkhel mawi lantir chungin an mikhual Napoli 2-0 in an hneh. Unai Emery naute hi Europa League semifinal lut turin an dinhmun a ṭha tawh hle, mahse Spanish manager chuan tlang chiang an la awm bik loh thu a sawi.

Ningani zan Europa League quarterfinal first leg inkhelah Gunners hian Aaron Ramsey hmanga goal hmahruai an khung hnuah, midfielder Lucas Torreira ball pet chu Kalidou Koulibaly-a'n an mahni lamah a ti lut.

Serie A pahnihna Napoli hian April 18, Ningani zan hian San Paolo Stadium-ah English club hi an lo mikhual ve leh thung ang. Italian manager Carlo Ancelotti chuan tlang turin inrintawkna an la neih thu a sawi ve thung.

Gunners an mawi

Emirates Stadium-a an match hnuhnung pasarihah hnehna an chang vek a, inrintawkna sang tak nen Napoli an mikhual. Season thara Napoli elpui Juventus player ni mai tur Ramsey chuan minute 14-na lekah goal hmahruai a khung.

Mesut Ozil, Alexandre Lacazette leh Ainsley Maitland-Niles ten a lira ball an inpek kual hnuah yard ruk chauha hla aṭangin Wales midfielder Ramsey-a'n a pet lut - Arsenal team goal mawi tak a ni.

March 7 hnua inkhel bul ṭan leh chauh Lucas Torreira chu midfield laia roreltu a ni a. Uruguay international hian Spanish midfielder Fabian Ruiz chu chiang zeta a bum hnuah yard 20-a hla aṭangin goal lamah a pet thut a, defender Koulibaly chuan lo dang pialin goalkeeper Alex Meret tan dan theih a ni lo.

Wales international Ramsey-a'n an goal thumna khung theihna hun nei mah se Meret a paltlang zo lo a, Italian goalkeeper hian Pierre-Emerick Aubameyang-a pet chu ṭha takin vawi thum a dang bawk. Ramsey bawkin a hun ṭha neih a hlah a, hnai tak aṭangin a pet over.

Arsenal manager Emery chuan, "Hna zatve kan zo, kan boruak tawn mek siamṭha tur leh hlawhtlinna chang turin hnehna chan a pawimawh, first leg-a chak hi kan tan chuan a ṭha hle," tiin Everton an hneh loh hnua an match hmasa bera an tho chhuak nghal chu a lawm thu a sawi.

Premier League table-a palina Gunners hian second leg khel tura Italy an pan hmain league match an khel zui leh phawt dawn. Thawhṭanni zanah FA Cup finalist Watford nen an intawng ang.

Napoli beiseina

Arsenal an hneh loh hnuah Napoli manager Carlo Ancelotti chuan an la beidawn loh thu sawiin, "Result hi thlak danglam a harsa a ni tawh mai thei, mahse minute 90 dang kan la khel leh dawn a ni," a ti.

Italian manager Ancelotti hian Napoli a enkawl hmasak ber season-ah Serie A nomawi a chawi dawn lo a, a la champion lohna Europa League-ah nomawi a la beisei thei thung. Emirates Stadium-ah an khel ṭha tawk lo a, goal hnih chauh an chhuah kha an vannei. Mahse, Koulibaly-a tauh leh substitute Adam Ounas te goal khung tur tawnhriat ngah keeper Petr Cech-a'n ṭha taka a dan sak chu an ui khawp ang.

Manager tawnhriat ngah tawh tak Ancelotti chuan, "Hun chanve hmasa lam kha kan khel ṭha lo hle, kan duh leh beisei angin kan khel thei lo. Mahse, second half-ah erawh goal khung thei turin hun ṭha kan insiam thei, kan khelmualah erawh min ṭantu fans an awm ṭha tawh dawn. Boruak a danglam ang tih ka ringtawk a ni," tiin a sawi.

Season tir khan Napoli hian Champions League group stage-ah Liverpool chu an mualah 1-0 in an hneh a, Ligue 1 champion PSG nen 1-1 a an inhnehtawk bawk avangin Gunners tan ngaihṭha taka awm a la rem lo.