Super Cup champion hriat zan

Indian Super League leh I League club-te inelna Super Cup chu zanin dar 8:30 hian final khelh a ni dawn ta a, ISL club pahnih FC Goa leh Chennaiyin FC ten champion an inchuh ang.

FC Goa hi chu season duhawm tak hmang mek an ni a, ISL-ah pawh final hial lut an ni - league lama an khelh ṭhat duhawm tak kha Cup inelnaah pawh an chhawm nung zel. Chennaiyin tan erawh ISL bikah season theihnghilh tlak a ni - champion lai ni siin league match 18-ah vawi hnih chiah an chak a, table mawngphahah an awm.

Mahse, South Indian club an muthlu rei lo - Super Cup-ah harhtharna an chang zui a, an season duhawm lo tia sawiah pawh Cup final an lut leh ta! FC Goa-in season khata final pahnih an khelhah a tlawm zawk ve ve nih an duh dawn lo a, Chennaiyin lamin ISL theihnghilh nan nomawi chawi an duh thung ang.

Goan club-in Mizo player kawl an nei lo a, Chennaiyin erawh Jeje Lalpekhlua, Jerry Lalrinzuala, Isaac Vanmalsawma, Zohmingliana Ralte leh Laldinliana Renthlei kawltu an ni. FC Goa tan ISL top scorer nilai Ferran Corominas hian Super Cup-ah goal li a khung leh der tawh a, midfield aṭanga amah chawmtu tur Edu Bedia a awm leh tak bawk avangin Chennai club tan ngaihngam taka awm ngawt chi a ni lo.

Chennaiyin tan Anirudh Thapa chu player pawimawh a ni leh dawn a, tlarhmaah Mizo tlangval Jeje Lalpekhlua leh CK Vineeth an ṭangkai bawk ang.

Final zinkawng
Qualification round
* Aizawl FC walkover avangin Chennai club an tlang.
* ISL table-ah parukna chunglam an nih avangin FC Goa tan qualifier khelh a ngai lo.

Round of 16
Chennaiyin 2 - 0 Mumbai City
Indian Arrows 0 - 3 FC Goa

Quarterfinal
FC Goa 4 - 3 Jamshedpur FC
Chennaiyin 2 - 1 NorthEast United

Semifinal
Chennai City 0 - 3 Goa
Chennaiyin 2 - 0 ATK