Lionel Messi tel lohna Barcelona
La Liga hmahruaitu Barcelona chu zanin dar 7:45 hian Huesca khelmualah an lenglut dawn a, an thiampuipa Lionel Messi chu league match-ah hian a inlan a rinawm loh.
Barcelona hi Champions League quarterfinal first leg-a 1-0 a Manchester United hneh hlim an ni a, United defender Chris Smalling chuan Messi hnar a nghawk thi. Inkhelh zawhah Messi hnar thi hi enfiah zui a ni a, hlauhthawnawm erawh a ni lo. Mahse, heti chung hian an hmachhawn tur club hi Huesca an nih avangin Ernesto Valverde-a'n a chawlh hahdamtir a rinawm zawk.
Catalan club tan Gerard Pique leh Luis Suarez chu hrem vangin an inlan dawn lo chiang bawk a, squad-ah Jeison Murillo leh Kevin-Prince Boateng te tan hmun a awm phah ang. Messi leh Suarez an inlan loh hian Barcelona tana tun season-a Barca tana goal 66 khung tawh an inlan dawn lo tihna a ni a, Barca hian Huesca an hmachhawn dawn miau avangin an tawrh lutuk erawh a rinawm chuang lo.
Valverde-a'n a chhawr rim ṭhin player-te tan chawlh hahdamna hun a siam a rinawm a; Carles Aleña, Todibo, Malcom, Sergi Roberto leh Samuel Umtiti te tan hmun a awm dawn tihna a ni. Barcelona hian La Liga-ah point 11-in hma an hruai fal mek a, Huesca erawh table mawng bera awm an ni thung - team pahnih inkarah hian point 49 ngawt a awm!
La Liga pahnihna Atletico Madrid chu zanin dar 10 hian an inlan dawn bawk a, Celta Vigo an mikhual ang. Madrid khaw club hian hnehna an chang zo lo a nih chuan La Liga nomawi an beiseina chu a tawp thei tawh hial ang.