Chelsea-in thawnthu hlui an her lum thei dawn em?

April 27, 2014 a ni a, Premier League nomawi inchuha Liverpool leh Manchester City in um vanglai tak a ni. Hetihlai hian Reds-in match thum khelh tur an la nei a, City-in match li an nei thung.

Liverpool-in Chelsea an mikhual a, anmahni ang thoa champion tum Manchester City-in Crystal Palace an lenchilh thung - match khata khel tlem zawk City-in Reds an phak lohna chu point ruk a ni. Merseyside club hian hnehna an chang emaw draw result an nei ringawt a nih pawhin champion turin an dinhmun a ṭha dawn tihna a ni a, City fans thinphu a rang.

Goal lut loa Chelsea leh Liverpool inhnehtawk laiin Reds captain chhuanvawr Steven Gerrard a tawlh thlu a, hei hi engkim danglamna a ni - Demba Ba chuan goal khung nan a hmang a, 2-0 in an chak zui.

City erawhin harsatna nei loin Crystal Palace an hneh a, a hnua match thum an khelhah an chak chho zui vek a, an champion. Tun thlengin Gerrard chetsualna chu Liverpool hmelma club-te sawi nuam tih ber a la ni reng a, chu deusawhna chuan Reds fan-te thinlung a ti na ṭhin.

En teh, a lo her leh ta...

Kum 2019 a ni a, thawnthu ngai kha her lum mai theih turin a inchhawp leh ta. Premier League hmahruaitu chu Liverpool an ni a, an hnuai chiaha awm chu anni aia match khata khel tlem Manchester City an ni.

Liverpool-in match nga chauh khelh tur neichungin Pathianni zan dar 9:00-ah Chelsea an mikhual dawn a, City-in 2013/14 season ang thoin Liverpool leh Chelsea inkhelh zanah Palace an hmachhawn dawn bawk - dar 6:35-ah an lenchilh ang. Pathianni zana thil thleng thei zawng zawng thlirin Anfield-a inkhel tur boruak a sang dawn tih hai rual a ni lo a, Reds hi an tlawm leh a nih ngat chuan fan-ten 2013/14 kha an hre chhuak vawng vawng ang - a hlui dawn lo!

Liverpool hian hnehna an chang a nih ngat erawh chuan Premier League nomawi an mitthla vuai vuai tawh a nih pawhin a mak lo ang. Club lian tum tur an nei tawh dawn lo a, City erawhin Manchester United leh Tottenham Hotspur an la hmabak dawn.

A na a ni!

Steven Gerrard vangin Liverpool-in nomawi tam tak an lo chawi tawh a, 2005 Champions League leh 2006 FA Cup nomawi phei kha chu Gerrard ropuina belhchhahtu an ni a, amah vang liau liaua champion an ni.

Mahse, Liverpool hian Gerrard vang bawkin tun thlengin Premier League nomawi an la chawi lo a, 'Captain Fantastic' tih hiala hming lem an pek Gerrard-a thinlungah pawh a thi thei lo. Scottish Premiership lama Rangers manager ni ta Gerrard hian, "Ka thlir let fo ang a, ka thinlung hi a na leh vawng vawng ṭhin dawn a ni," tiin he a hun tawn hi a sawi thlawt a, a na tih phat rual a ni lo.

Liverpool tan Chelsea laka phuba lak hun a her chhuak ta - Pathianni zanah Chelsea hi an hneh a nih ngat chuan Blues Champions League khelh beiseina an ti tawp ang hialin a ngaih theih ang a, chu chu Reds fans tam tak damna tur a ni ang.

Mangṭha 2014!

Nizanah Jurgen Klopp-a'n press conference a hmachhawn a, he huna an zawh hmasak pawl pawh kum 2014 thil thleng kha a ni. Klopp tan erawh thawnthu hlui, sawi nawn ṭul lo a ni. German coach chuan, "Press ho hmachhawn tura ka rawn luh hma zawng kha chuan 2014 hian ka ngaihtuahna a luah eih lo. Kan season hman mek hi season dang nen khaikhin kan tum lo.

"Kum 2014-a thil thleng kha kei chuan ka hre lo a, tunah hian ka zam hek lo. A boruakin min chiah a, a nuam ka ti a, a eng lam zawngin engkim kan thlir a ni," tiin hnehna chan ngei a tum. Chelsea-in Liverpool beiseina ti tawp thei an kawl chu Eden Hazard a ni. Klopp chuan, "A khelh ṭhat ni chuan khawvela player ṭha ber a ni hial ang. Mahse, Hazard hi dan kan tum dawn a ni," a ti a, Anfield-ah Belgian forward vul tir a tum lo.

Pep a fimkhur

City-in United leh Spurs an la hmabak miau a, Palace laka chetsual hi pawi thui thei tak tur a ni. City boss Pep Guardiola chuan, "Player ṭha tak tak an nei a, a harsa dawn. Match ruk khelh tur kan la nei a, ṭha takin kan inbuatsaih dawn. Season tawp lamah chuan match zawng zawng hi final a ni vek tawh a ni," tiin a fimkhur hle.

Pep chuan a player inhliam Oleksandr Zinchenko leh Bernardo Silva ten ngai an awh leh tawh thu a sawi a, Palace lakah chhawr theih turin an awm tawh dawn.

City hi Champions League quarterfinal-a Tottenham Hotspur ngam lo hlim an ni a, Palace zawhah Spurs hi second leg-ah an hmachhawn leh ang - hriat tur chu Liverpool aiin an fixture a hautak zawk.