BFI Athletes & Youth Commission member-ah Mizo

Boxing Federation of India (BFI) hnuaia commission pawimawh tak Athletes & Youth Commission member atan Lalduhkima Sailo (Duduha) chu ruat a ni a, Mission Vengthlang pa hi Mizo zinga he commission member hmasa ber a ni.

Duduha hian Mizoram Boxing Association (MiZBA)-ah Athletes & Youth Commission chairman dinhmun a chelh mek. BFI Athletes & Youth Commission hi kawng hrang hranga boxer-te aiawhtu an ni a, an dinhmun venhim leh chawisan chu an hna a ni a. An tum ber chu ṭhalaite boxing infiamna hmanga eizawnna tur hna siam sak a ni.

Mizoram boxing-in tun hnaiah hma a sawn chho mek a, MiZBA secretary general Dr Lalrozama, IAS chu BFI North East Zonal secretary a ni bawk. Duduha chuan, "Mizote hian boxer ṭha tak tak kan chher chhuak a, international medallist Zoramthanga kan lo nei tawh a, India camp-ah boxer ṭhahnem tak an awm tawh a, kan neih belh zel. Chuvangin India ram hruaitu zinga tel ve hi kan phu a, Pu Rozama leh BFI hruaitute duhsakna ka chang hi ka lawm hle. Mizo boxing-in hma a sawn theih nan theihtawp ka chhuah ang," tiin Vanglaini a hrilh.