Jeremy tan Weightlifting set

Sports Authority of India (SAI) chuan Jeremy Lalrinnunga hman atan ELEIKO IWF Olympic Weightlifting Competition set 190 kg an pe. Cheng nuai 3.6 man bungrua hi Sports and Youth Services (SYS) enkawl State Sports Coaching Centre, Govt. Complex-ah dah a ni.

Govt. Complex-a training centre hi Jeremy-a inzir chhuahna hmun a ni a, he hmunah hian kum 11 mi bawr vel chauh a nih lai khan mau bung (Bamboo) leh tui pipe (water connection pipe) hmang tein inzirna bul a ṭan.

Mizo rawlthar duhawm hi tunah chuan India tana Youth Olympic gold medal la thei hmasa ber a ni tawh. Tunah hian 2020 Summer Olympics, Tokyo-a tel tumin a inbuatsaih mek a, April 18-28 chhung hian China-ah Asian Senior Weightlifting Championship a khel ang.