Point mamawh Arsenal hmaah Liverpool

Zanin dar 12:30 hian Emirates Stadium-ah Premier League inkhel hmuhnawm en tur a awm dawn. Palina nih phak tum Liverpool leh European football la beisei ve ṭang ṭang Arsenal an inhmachhawn ang.

International break zawh chiah hi inkhelh harsat hun tia sawi ṭhin a ni. Club lian leh ṭha zawk pawh an chesual fo - Gunners leh Reds hi season hmang ṭha lo ni mah se, kum hman chhiat thup theihna remchang a ni dawn a, chak a pawimawh dawn.

A pawimawh

Mikel Arteta nauten kuminah beisei an phak lo a, an match hnuhnung berah West Ham laka goal thum an chhuah hnuin point khat an sual thei chhuak hram. Liverpool lakah tlarhnung remphui a pawimawh dawn.

Arsenal manager Arteta chuan, "Liverpool tlarhmate an che rangin an tlan tam hle, tihsual zeuh kan nei a nih chuan min hrem nghal ang. Ti dik vek pawh ni ila hlauhawm takin an che thei tho, chuvangin fimkhur luat a awm dawn lo.

"Season kal laiah che fuh lo deuh mah se tuna an team hi ropui taka champion tawh kha an ni, a bik takin Manchester City nen inelna sang tak an neih avang khan level sang takah an awm," a ti a, inrintawkna an neih san theih nan chak a pawimawh thu a sawi bawk.

North London club hi league table-ah pakuana an ni mek, palina Chelsea an phak lohna chu point kua lai a ni. Ningani zanah Europa League quarterfinal khel turin Slavia Prague an mikhual zui leh dawn a, player siksawi a ngaih hmel.

Arteta chuan, "League match khelh hmabak pakua kan la nei, chuvangin EPL aṭangin European football kan beisei tur a ni, tunah chuan Liverpool kan hmachhawn tur kan ngai pawimawh ber," a ti. Spanish manager hian Jurgen Klopp lakah chak a tum dawn.

Jota leh Firmino

Premier League champion Liverpool tan nomawi humhim beiseina a thamral tluk a ni tawh a, a sang pali zinga tel phak tal an la tum. Thawhlehni zanah Real Madrid khel tura an zin chhuah zui nghal dawn avangin an hmabak a hautak hle.

Hliam vangin Reds an buai a, an player hliam la dam vek lo mah se tun hnaiah lawmna tur an nei. Inkhel turin Roberto Firmino a inpeih a, a hliam dam hnuah Diogo Jota chuan Portugal tan a match hnuhnung pahnihah goal thum a khung. Nimin tlai khan Klopp chuan, "Inkhel turin Firmino a inpeih, Europe a inkhel player dangte erawh an dinhmun tak ka la hre lo - tun thleng chuan chanchin ṭha lo leh harsatna lian tham chu ka la hre lo," tiin nimin tlai khan a sawi.

German manager hian hliam vangin Jordan Henderson a la khel dawn lo a, an captain hian training a zawm hnai tih erawh a sawi tel thung. England tana koh loh Trent Alexander-Arnold-a'n training a zawm pangngai a, zaninah a inlan thei ang.

Klopp chuan, "Season tawpa kan thlen chin tur kan thlir a ngai a, point hloh vak a thiang tawh lo. A bul kan ṭan fuh loh avang hian kan chiai chuang lo a, tunah hian a thui thei ang ber thlen kan la tum," tiin a sawi a, palina ni phak turin Arsenal hneh ngei a tum.