Real leh Barca-in Haaland an dawr

Tunlai striker 'hot' ber pawl tia chhal ngam Erling Braut Haaland-a agent Mino Raiola chuan Barcelona leh Real Madrid chu inbiakna a neihpui a, Borussia Dortmund striker hian season tharah chuan German club hi a chhuahsan ngei dawn niin a lang.

Raiola hian Barcelona president thar Joan Laporta leh Real Madrid president Florentino Perez-te chu inbiakna a neihpui a, he indawrnaah hian Haaland-a pa Alf Inge pawh a tel.

Alf Inge leh Raiola hi Barcelona-ah hmuh an ni a, Spanish football expert Guillem Balague chuan, "Mipui hmuha in pholan hi an tum reng a ni a, Spanish club lian pahnih leh Haaland inbiak thu a darh hian an vaia tan hlawkna vek a ni. Barca hi a ruka luh duh ni se luh awlsam tak a ni," a ti.

Barca hi sum lamah an talbuai mek a, an chhuanvawr Lionel Messi chelh tumin an hman hlel bawk. Balague chuan, "Barca hian Europe top club-te nena inel reng loh chu an duh lo a, hming langsar hlir dawr an duh. Tun dinhmunah chuan an buaina lam thlir ai chuan Messi chelh a, player langsar pakhat lakluh bawk hi an tum chu a ni," tiin a sawi.

Real Madrid-in lakluh an tum ber chu Paris St-Germain striker Kylian Mbappe a ni a, mahse, French striker hi an lalut thei lo a nih chuan Haaland lakluh an duh.

Manchester City chuan season tawpa chhuak tur, Barca nena sawizawm mek Sergio Aguero thlaktu turin Haaland hi an duh ve bawk nia sawi a ni a, Balague chuan, "Haaland hian duhtu a ngah avangin Barcelona nena an inbiak thu midangin an hriat hi an tan chuan a ṭha a ni," a ti a, Norwegian striker hi Raiola chuan itawm taka phochhuah a tum niin a lang.

Kum 20 mi Haaland hian December 2019 khan Borussia Dortmund-a zawm a, a season hmasa berah match 18 khelin goal 16-a khung a, tun season-ah match 31 khelin goal 33-a khung tawh bawk.

Haaland hian a career-a Champions League match 14 lek a khelhah goal 20-a khung tling tawh a, Dortmund hi tun season quarterfinal-a hruai thleng bawk - April 6 zan khian amah duhtu zinga mi Manchester City nen quarterfinal first leg an khel ang.

Dortmund-ah hian kum 2024 nipui thleng cham turin contract a nei mek a, European club liante hian lakluh an duh a nih chuan pound maktaduai 128 tal an thehchhuah a ngai dawn thung.