North Macedonia-in Germany an hneh!

World Cup khel tur zawnnaah vawi li champion tawh Germany-in an mualah North Macedonia an hneh lo. 2014 World Cup champion hneh loh North Macedonia hi FIFA ranking-ah 65-na an ni a, Joachim Low kaihruaina hnuaiah an mualpho ngun a hle.

MSV Arena, Duisburg-ah North Macedonia-in Goran Pandev hmangin first half injury time-ah an khung hmasa a, Ilkay Gundogan penalty hmangin Germany-in minute 63-naah sut mah se mikhual team tan Ejif Elmas-a'n minute 85-naah chakna goal a khung.

Mualphona chu

Germany hian champion lai nichungin FIFA World Cup 2018 an hmachhawn a, group F-ah Sweden, Mexico leh South Korea te nen an awm ho. Joachim Low hote tan group stage patlang hi harsa tur niin lang lo mah se table mawngphaha awm chungin an tla.

Die Mannschaft hian Mexico an hneh loh hnuah Sweden an hneh a, inkhel pawimawh South Korea lakah an tlawm. Low-a'n player langsar Thomas Muller, Jerome Boateng leh Mats Hummels te a koh zui loh tur thu a sawi a, mak tih a hlawh.

Player ṭha pathum tel lo hian Nations League hmasa ber an hmachhawn a, Netherlands leh France nen awm hoin chak an nei lo. Relegate tur ni mah se Nations League kalphung an thlak a, an him hlauh. Nations League vawi hnihnaah Germany-in finals lut thei turin an match hnuhnung berah Spain draw chiah an mamawh.

Amaherawhchu La Roja hian Germany hi Seville-ah 6-0 in an sawp a, Low ban duhtu pawh an pung hle. Germany football thuneitute erawhin coach an hum tlat a, insiamṭhat theih an la beisei reng.

An insiam ṭha lo

Joachim Low-a'n Germany enkawl zel a tum tawh loh thu a puang a, a chawlh hun tur erawh Euro 2020 zawhah a ni thung. World Cup khel tur zawnnaah Low hian Muller, Boateng leh Hummels te a ko duh chuang lo a, chutihrualin Iceland leh Romania an hneh avangin bul erawh a ṭan ṭha.

North Macedonia hneh leh chiah se Low-a'n pressure a nei tlem dawn. Amaherawhchu Goran Pandev captain-na hnuaia khel North Macedonia-in Germany an barakhaih. Die Mannschaft hian inkhel thunun mah se goal an khung thei tlat lo. Chelsea forward Timo Werner-a'n a goal khung theihna a hloh a, chance ṭha a hlah.

Germany-in an mualah North Macedonia an hneh lo a, Euro Championship atan inrintawkna neih let a har phah ang. Joachim Low-a'n thutlukna a sawhsawn dawn lo a, Euro C'hsip hmain ban a tum lo a, Germany thuneitute pawhin ban an tum bik lo.

Chutihrualin Low erawhin pressure a ngah tawh avangin Muller, Boateng leh Hummels te tan Euro C'ship khelh theihna kawng a inhawngah a ngaih theih thung.

Armenia pakhatna

Germany te awmna group-ah hian mak takin Armenia chu pakhatnaah an awm. FIFA ranking-a 99-na Armenia hian Liechtenstein (1-0), Iceland (2-0) leh Romania (3-2) te hmachhawn tawhin an hneh vek. World Cup khel tur zawnna hi September thlaah khelh chhunzawm a ni leh dawn chauh a, Setpember 2-ah Armenia hian Germany hnehtu North Macedonia an hmachhawn ang.