England chhandamtu Maguire

England-in Wembley Stadium-ah Poland 2-1 in an hneh hram. Three Lions tan Harry Kane-a'n minute 19-naah penalty a khung a, Poland-in Jakub Moder hmangin minute 58-naah an sut. In draw thei dinhmuna an din hnuah Harry Maguire-a'n minute 85-naah chakna goal a khung.

Nilaini zan inkhelah hian England-in bul an ṭan ṭha a, inkhel an thunun nghal. Chutihrualin goal khung turin vanneihna an mamawh a, Kane-a'n penalty a pet goal theih nan Raheem Sterling box chhungah a tlu thiam hle. Manchester United defender Maguire-a'n box chhungah a kutin ball a khawih a, Poland-in penalty an hmu lo. Robert Lewandowski tel lo chungin Poland-in England tlarhnung an tibuai a, John Stones tihsual zarah Jakub Moder-a'n siphurh a sut.

Three Lions an hlauthawng a, amah-erawhchu striker ṭhate tih ṭhin danin Maguire-a'n mawi zetin chakna goal a volley lut. England an khel chhe lo a, an tlarhnung erawh enfiah a ngai thung. Group I inkhel dangah Hungary-in 4-1 in Andorra an sawp a, Albania-in San Marino 2-0 in an hneh bawk. Table-ah erawh vawi thum khelha chak vek Gareth Southgate-a hoten hma an hruai chhun-zawm zel.