FPAI Indian Football awards Mizo hming a mawi leh ta
India rama football hmanga eizawng intelkhawm pawl Football Players Association of India (FPAI) chuan FPAI Indian Football awards an sem chhuak leh ta a, Jerry Mawihmingthanga leh Lalengmawia (Apuia)-ten award an dawng.
FPAI hian nikum lamah award an sem loh avangin season hmasa leh season hman zawh tak award chu a rualin an sem a, Jerry (2019-20) leh Apuia (2020-21)-te hian Young Player of the Year chawimawina an dawng. Igor Stimac-a'n India tana inlan tura ṭha tawk loa a ngaih ATK Mohun Bagan keeper Arindam Bhattacharya chuan FPAI Indian Player of the Year chawimawina a dawng a, 2019-20 chawimawina chu Sunil Chhetri hlan a ni thung.
FPAI Award dawng turte hi ISL leh I League-a player-ten vote hmangin an thlang a, player tan chuan he chawimawina dawn hi a hlu bik.
Jerry a mawi
Season hmasa ṭan dawn khan Jerry-a'n Jamshedpur FC aṭangin Odisha a pan a, Odisha-a a season hmasa berah league match 17 khelin goal hnih a khung a, assist vawi nga a bei bawk.
Jerry hian season hman zawh takah pawh khan 2019-20 season ang thoin league match 17 a khel a, goal hnih khungin assist vawi nga a nei - Indian player langsar pawl a ni.
FPAI lama professional footballer ho pawhin hei hi an hmuh hmaih lo a, 2019-20 season-a Indian player rawlthar ṭha berah Jerry an thlang. He season-ah hian hero of the match-ah vawi hnih thlan a ni a, emerging player of the match thlan ṭhin lai niin he award hi vawi nga a dawng bawk.
Jerry-a tan FPAI awards hi thil thar a ni lo - Chanmari tlangval hian 2017-18 season khan Jamshedpur tana a khelh laiin Young Player of the Year award hi a lo dawng tawh a, a zawnin he chawimawina hi a dawng tihna a ni.
Hei le Apuia
Tun season ISL titi luahtu ber chu Apuia a ni a, Vaivakawn tlangval hian rin lawk ang ngeiin Young Player of the Year (2020-21) award a dawng - thik rual a ni lo.
NorthEast United midfielder hian season hman zawh takah khan Highlander tan match 22 a khel a, goal khat khungin ISL semifinal an luh theih nana player ṭangkai a ni. Apuia hi holding midfielder a nih avangin goal khung leh assist aṭanga teh chi a ni lo a, NorthEast United midfield leh defense thlun zawmtu pawimawh a ni a, season tluana tackle a neih zat hi 93-a tling!
FIFA Under 17 World Cup, 2017-a India tana inlan phak Apuia hian season hman zawh takah khan vawi 811 ngawt ball pass chhuah a neih a, a pass dik zat hi 74.47% a tling - hero of the match-ah vawi li thlan a ni.
Indian player ṭha ber
India squad-ah Arindam Bhattacharya tan hmun awm lo mah se a khelhpuiten season hman zawh taka Indian player ṭha berah an ngai a, ISL final-a ATK Mohun Bagan hruai thlengtu hi Indian Player of the Year atan thlan a ni.
Kum 31 mi keeper hian season hman zawh takah khan ISL match 23-a khel a, match 10-ah goal-a chhuah loh avangin Golden Glove a dawng - target-a shot vawi 78-a hmachhawn zinga 59 chu a dang thei a, a save percentage hi 75.64% a tling. Kum 36 ni tawh mah se Sunil Chhetri a la tar thei lo a, 2019-20 season-a Indian player ṭha berah thlan a ni. Chhetri hian hemi season-ah hian league match 17 a khel a, goal kua a khung.
Chhetri hian ISL semifinal-ah a team a hruai thleng a, final erawh a luhpui zo lo thung - season hman zawh takah pawh khan league match 20 khelin goal riat a khung a, assist vawi hnih a nei.
Hei le Khalid
NorthEast United coach Khalid Jamil chu Coach of the Year ( 2020-21) atan thlan a ni a, Aizawl FC boss hlui hian season hman zawh takah khan Highlander chu ISL semifinal a hruai thleng a ni.
Khalid hian ISL season laihawlah Gerard Nus thlakin Highlander enkawl hna a thawk a, league match sawm zet a zawna tlawm an neih loh hnuah a team hi semifinal a hruai thleng - Indian coach zinga ISL semifinal-a a team hruai thleng thei hmasa ber record-a siam.
Khalid hian Indian football-ah chanchin ngaihnawm tak tak a lo hnutchhiah nual tawh - I League vanglai, player ṭha zawng zawngin I League an la khelh lai, 2016-17 season khan Aizawl FC chu rin loh takin a champion pui.
Hemi season-ah pawh hian FPAI Coach of the Year-ah thlan a lo ni tawh a, 2017-18 khan season hnih chhunga vaibelchhe 1.25 hlawh turin East Bengal a pan zui - Indian coach zinga hlawh hnem ber record a siam a ni.
Vanglaini Biangbiakna
Award dawn hi ka beisei loh thil a ni a, ka dawn takah chuan ka hlim hle. Ka khelhpui ka ṭhiante leh coaching staff-te vanga dawng ka ni a, an chungah lawmthu ka sawi. Ka chhungte leh fan-te thlawpna pawh hi sawi hmaih theih a ni lo. Ka player puite vote a nihna hian minti hlim lehzual a, ka lawm takzet zet.
- Jerry Mawihmingthanga, Odisha FC
Award dawn hi ka rilruah a lo awm chiah lo a, he chawimawina ka dawng thei hi a hlu ka ti hle. Ka player puiten award dawng tlakah min ngai a, min vote hi an chungah ka lawm takzet a ni.
- Lalengmawia (Apuia), NorthEast United