Bautista Agut lakah Medvedev a tlawm

Daniil Medvedev chu Roberto Bautista Agut hneh loin Miami Open quarterfinal-ah a zinkawng a tawp a, player langsar leh ṭha dangte awm loh hlana ATP Masters 1000 lak a beiseina chu a thamral.

Inrinnia quarterfinal inkhelah Medvedev hi 6-4, 6-2 in a chak lo. Russian tlangval hi season kal laiah vawi hnih chauh chak loh nei chungin Florida khawpuiah a inlan a, mahse a beisei angin a khel chhuak ta lo.

Miami Open-ah hian mipa player ranking sang paruk zinga pali ngawt an inlan lo. Medvedev hi seeded pakhatna pek a ni a, a chak loh hma pawh hian player langsar lo Alexei Popyrin lakah harsa takin hnehna a lo chang hram tawh.

Spanish tlangval Bautista Agut chuan, "Set hnih chhung leka Daniil ka hneh thei kha a mak, a awmzia chu ka khel ṭha takzet tihna a ni. A racquet a ti chhe lai kha ka hmu, dawhtheihna a nei tawh lo tih ka hriat khan ka tan khelh a awlsam sawt," a ti.

Seeded pasarihna Bautista Agut hian a match lehpekah chuan Jannik Sinner a hmachhawn leh ang. Inkhel dangah Stefanos Tsitsipas chu Hubert Hurkacz lakah 2-6, 6-3, 6-4 in a lo tlawm ve bawk.