Ramos-a'n Liverpool a hmachhawn thei dawn lo

Real Madrid captain Sergio Ramos chuan a chawn tha hliam vangin Champions League quarterfinal-ah Liverpool a hmachhawn thei dawn lo a, Premier League champion tan lawma zuanpui tham thu lawmawm a ni.

Kum 35 mi defender hi international break-a Spain tana a fehchhuahna lamah a inhliam a, Spanish defender chuan, "Min tinatu a awm a nih chuan, hun pawimawha ka team ka ṭanpui thei lo hi a ni ang," tiin social media lamah a ziak.

Real hian Champions League quarterfinal first leg-ah April 6 zan khian Liverpool an mikhual dawn a, April 14 zanah second leg khel turin Anfield an pan leh bawk ang.

Champions League 2018 final-ah khan Real leh Liverpool hi an lo inhmachhawn tawh a, 3-1 a Real chakna inkhelah hian Ramos chuan Reds thiampuipa Mohamed Salah dar a hliamsak avangin kumina an intawng leh tur boruak pawh a sang hle.

Mahse, Salah chuan, "Hnehna chana semifinal luh ka duh a, vawiina thil thleng hian Kiev-a thil thleng kha a thlak tawh dawn lo. A tawp tawh," tiin Ramos huatna a neih loh thu a lo sawi tawh.

Ramos hian Spain-in 3-1 a Kosovo an hnehna inkhelah hliam hi a nei a, an inkhelh hma training-naah a chawn tha na hi a hriat ṭan tawh thu a sawi.

Khawvela centre back ṭha ber ang hiala mi tam takin an ngaih Ramos tel loin Real hian zanin dar 7:45-ah league match khel turin Eibar an mikhual ang a, Liverpool an hmachhawn inkarah April 10 zan hian Barcelona an mikhual dawn bawk - El Clasico result hian an league nomawi beiseina thui takin a hril dawn.