Super Cup-ah FC Goa an champion

Indian Super League club FC Goa chuan an club chanchina a vawi khat nan nomawi an chawi ve ta - Inrinni zan khan Super Cup-ah Chennaiyin FC chu 2-1 in an hneh. FC Goa tan goal khung khawl Ferran Corominas leh Brandon Fernandes te chuan goal khat ve ve an khung a, Chennaiyin tana Raphael Augusto goal khungin awmzia a nei lo.

Chennaiyin erawh ISL season duhawm lo tak an hman khuh bo tura nomawi chawi an tumna a thamral a, kut ruakin tun season an mangṭha a ṭul ta. FC Goa coach Sergio Lobera chuan, "Nomawi pahnih chawia season khar thei kan ni hial zawk a, kan thlen chinah erawh ka lawm a ni," a ti.

Team pahnih

FC Goa hi ISL-a an attacking football hmingṭhatpuitu an ni a, Chennaiyin hi an defensive game hmingṭhatpuitu an ni thung.

Goan club hi ISL final-a chak lo hlim, Super Cup hmanga an rilru na thawidam tumtu an ni a, nomawi chawi loa season khar nawn an duh lo. Chennaiyin hi season hmasa ISL champion, tun season-a beisei phak lo, table mawnga awm chunga season khar an ni a, Super Cup hmanga an hmingṭhatna hlawh let tum an ni.

Team ṭha tak pahnih, chakna in ang lo tak, phurna chhan in ang lo tak an ni a, inkhelh hma aṭangin boruak a sang.

An inkhel ta

Kalinga Stadium, Bhubaneswar-ah team pahnih an intawng ta ngei a, goal awm loa chawlhlawk an hman hnuah Ferran Corominas chuan minute 51-naah goal hmahruai a rawn khung.

Goa goal hmasa hi tun hnaia che ṭha tak Chennaiyin midfielder Anirudh Thapa chetsual zar a ni a, Thapa ball chhuhsaktu Hugo Boumous-a shot per chu Coro hian goal-ah a chantir. Chennai club-in awlsam taka tlawm an duh lo. Goal an chhuah aṭanga minute thumna lekah Raphael Augusto chuan si phurh a rawn sut ve lehnghal a, inkhel boruak a nung sawt.

Minute 64-naah Goa bawkin goal an khung a, Coro-a siamsak chu Brandon Fernandes chuan ṭha zetin a pet lut a, FC Goa an chak.

Hmabak ISL

ISL top scorer Coro-a'n Super Cup-ah goal nga khungin top scorer a ni leh ta a, tun ṭum a danglamna erawh mimal lawmman piah lamah team nomawi a chawi tel.

Espanyol forward hlui chuan, "Mimal lawmman dawn hi a nuam a, mahse team nomawi hi a pawimawh ber chu a ni. Ka beisei ber a la inthlak lo a, chu chu ISL a ni," tiin league nomawi chawi ngei a duh. FC Goa coach Sergio Lobera chuan, "Player-te thawhrim rah a ni a, an khel ṭha takzet. Thawnthu hlui in keu let chuan he club hian nomawi chawi a phu tawh takzet tih in hmu ang.

"Tunah chuan season hman zawh taka kan chak lohna te kan en ang a, season tharah kan tan eng nge awm tih kan thlir dawn a ni," tiin eng takin season thar a thlir nghal.

Gregory a lungawi lo

Chennaiyin FC-in hnehna an chang zo lo a, coach John Gregory a lungawi thei lo. English manager chuan, "Ni 10 chhunga match li kan khelhna a ni a, kan tan chuan fixture duhawm lo tak a ni," tiin inkhelh hnem vanga an chauh thu a sawi.

Chennai club hian AFC Cup an khel bawk a, hei vang hian FC Goa aiin match an ngah zawk. Gregory hi Aizawl FC walkover chungchangah a lawm lo bawk. "Walkover a awm a, chumi pawm tur chuan ni khat tawp thlawhtheihnaah kan chuan a ngai. Mahse, AIFF member ka ni lo a, engmah tih theih ka nei lo," a ti!

Derby County boss hlui hian Goa lawmpuina thu sawi zuiin, "Goa ka lawmpui a, nomawi chawi an phu a ni. Sergio hi coach ṭha a ni mai lo a, mifel tak pawh a ni tel a ni," a ti a, a ngam loh coach a fak.