F1 ni pawimawh bikah Hamilton a chak ber
Nimin khan Formula 1 intlansiak vawi 1000-na chu Shanghai International Circuit-ah tlan a ni a, world champion ni lai Lewis Hamilton-a'n Chinese Grand Prix-ah hian hnehna changin kumina a vawi khat nan driver championship hmahruaitu an ni.
Mercedes driver Hamilton hian a teammate leh pole position aṭanga bul ṭantu ni bawk Valtteri Bottas tlanpelin hnehna hi a chang. Mercedes car khalhtu pahnih hnungah hian Sebastian Vettel leh Max Verstappen te an thleng thung.
Mercedes chungnung
Qualifying tlan lai aṭangin Mercedes an chefuh nghal, season bul ṭan ṭha tak Bottas-a'n champion lai Hamilton aiin 0.023 second chauha hun a hman tlem avangin a hmasa ber aṭangin inelna bul a ṭan - intlansiak hnuhnung pahnih aṭanga hmahruaitu a nih bawk avangin beiseina a nei sang.
Inelna takah erawh Hamilton-a'n a tawnhriat neih ṭhat a chhawr ṭangkai, a teammate Bottas a tlan pelh hnuah hnunglam a hawi tawh lo, second nga vela tlan falin lap 55 an tlan chhunga tlan ṭha leh chungnung ber a ni.
Britain tlangval hian car intlansiakna sang berah hian vawi 75 zet hnehna a chang tling tawh a, record nei ṭha ber Michael Schumacher a phak lohna chu vawi 16 a la ni thung - tun season bakah season lehpek ṭha taka a hmang thei a nih chuan German driver sulhnu nihrual emaw khum theihna hun a nei.
Kum 34 mi Hamilton chuan, "Intlansiak hnuhnungah khan Ferrari an tlan chak em em a, tihsual an neih zauh erawh an tuar. Engtianga chakin nge an rawn tlan dawn kan hre lo a, anni bakah ka teammate Valtteri khan qualifier a tlan ṭhat em avangin ka tan hnehna chan beiseina a sang lo.
"Mahse, Sanghai hi tun hma lama hlawhtlinna ka chan fo tawhna hmun a nih vang leh, min ṭantu tam tak awmna hmun a nih avangin ka zam lo. Chinese GP bikah a vawi nga nana hnehna ka chang thei hi ka lawm hle," tiin a sawi.
Beisei phak lo Ferrari
Lap hmasa ber an tlan laiin Ferrari driver-te chu pahnihna leh pathumnaah an tlan a, team lam aṭanga thupek an hmuh angin Charles Leclerc chuan kawng kawi hmasa lamah a teammate Vettel chu a intlan pelhtir.
World champion vawi li ni tawh Vettel hi chak taka tlan zuia hnehna chang thei tura beisei a ni. Mahse, German tlangval hian Red Bull car a khalh laia a vanglai ang kha a tawng thei rih lo, driver beiseiawm Leclerc pawh panganaah a thleng hram.
Tun season intlansiak pathum an neih tawh chinah Ferrari hian hnehna an la chang ve miah lo. Australian leh Bahrain Grand Prix-ah te Bottas-a'n hnehna a chang a, tun ṭumah Hamilton a chak leh tak avangin Mercedes tan duhthusama season bul ṭanna a ni.
Kum 31 mi Vettel chuan, "Leclerc ai khan ka tlan chak zawk theih ka inbeisei a, driver pahnih kan inpelh danah kha chuan thil fel lo leh dik lo a awm lo. Beisei anga ka tlan chak zui thei lo erawh a pawi ka ti," tiin Leclerc-a'n kawng a ken chungchang a sawi.
German driver chuan an elpui chungchang sawi zuiin, "A tir aṭang khan Mercedes kha el an hautak hle. Lewis leh Valtteri te bakah Max hi a tlan ṭha thei em em a, kan tan hun ṭha a la inher chhuak thei rih lo mai a ni. Podium ka lawn hi ka lawm a, Ferrari team-in hnehna kan chan hun a thleng har tawh lo ang," a ti.
Formula 1 hi tun season chhungin intlansiak vawi 21 a awm dawn a, Grand Prix pathum neih tawh niin a palina atan April 28 hian Baku City Circuit-ah Azerbaijan Grand Prix tlan a ni ang.
Chinese Grand Prix Results
# Driver Ram Team
1 Lewis Hamilton GBR Mercedes
2 Valtteri Bottas FIN Mercedes
3 Sebastian Vettel GER Ferrari
4 Max Verstappen NED Red Bull
5 Charles Leclerc MON Ferrari
6 Pierre Gasly FRA Red Bull
7 Daniel Ricciardo AUS Renault
8 Sergio Perez MEX Racing Point
9 Kimi Raikkonen FIN Alfa Romeo Racing
10 Alexander Albon THA Toro Rosso
Driver Championship Table
# Driver Team Points
1 Lewis Hamilton Mercedes 68
2 Valtteri Bottas Mercedes 62
3 Max Verstappen Red Bull 39
4 Sebastian Vettel Ferrari 37
5 Charles Leclerc Ferrari 36
6 Pierre Gasly Red Bull 13
7 Kimi Raikkonen Alfa Romeo Racing 12
8 Lando Norris McLaren 8
9 Kevin Magnussen Haas 8
10 Nico Hulkenberg Renault 6