Kohli hoin RCB chak ve ta

Indian Premier League khelh mekah Ro­yal Challengers Banga­lore-in hnehna an chang ve ta a, match ruk ngawt a zawna an tlawm hnuah Inrinni zan khan Kings XI Punjab chu wicket riatin an hneh.

Kings XI tan Chris Gayle chuan run 99 ngawt siamin a tawp thleng a dam a, over 20-ah run 173 siamin wicket li chiah an hloh - player dang zingah run 20 vaw kai awm lo mah se Gayle ropuinain a hliahkhuh.

Bangalore tan Virat Kohli chuan run 67 ngawt a rawn siam a, AB de Villiers chuan run 59 siamin a tawp thleng a rawn che ṭha viau bawk - over 19.2-ah wicket hnih chiah hlohin an target an umphak a, a vawi khat nan Bangalore an chak.

Inrinni zan inkhel dangah Rajasthan Royals chuan wicket liin Mumbai Indians an hneh a, MI tan a tira ding Rohit Sharma (47 runs) leh Quinton de Kock (81) che ṭha viau mah se an team chak nan a tawk lo.

Mumbai khawpuia inkhelah mualneitu team hian over 20-ah run 187 siamin wicket nga an hloh. Mahse, Rajasthan tan Ajinkya Rahane (37) leh Jos Buttler (89) an rawn chet ṭhat ve tho avangin over 19.3-ah target an umpha a, wicket ruk chiah hlohin an chak.