Spurs an thiam, United an vannei

Tottenham Hotspur chuan Premier League pathumna dinhmun hauh let turin Inrinni zan khan Huddersfield Town chu 4-0 in an sawp a, Lucas Moura chuan hattrick a siam.

Inkhel dangah Manchester United chuan Paul Pogba penalty vawi hnih hmangin West Ham 2-1 in an hneh hram a, Ole Gunnar Solskjaer hoten Champions League khelh beiseina an nei chhunzawm zel. Zanin dar 12:30 hian Arsenal chuan FA finalist Watford chu Vicarage Road-ah an lenchilh ang.

Kane a tel lo

Spurs goal khung khawl Harry Kane chu Manchester City nen an inkhelh ṭuma a inhliam avangin tun season chhungin a inlan theih a rinawm tawh loh. Amaherawhchu Mauricio Pochettino hote hian Kane bakah inhliam dang Dele Alli leh Harry Winks te tel loin Huddersfield Town chu 4-0 zetin an sawp.

Nilaini zana khelh tur Champions League thlir chungin Son Heung-min chu bench-ah dah a ni a, Fernando Llorente leh Moura te chu goal khung tura dah an ni. Kane thlaktu Llorente-a'n goal khung lo mah se minute 24-naah Victor Wanyama goal khung tur a siam sak.

Spurs tan Christian Eriksen chu ṭum dang ang thoina ṭangkai a, Dane midfielder leh Spanish striker Llorente ten woodwork an pet per ve ve. Inkhela langsar ta ber erawh Moura a ni a, Brazilian forward hian Spurs tana a hattrick hmasa ber a siam.

Kum 26 mi Moura hattrick siamna goal hi goal ṭha tak vek a ni a, PSG player hlui talent nei ṭha zet hian inkhelh banah 'Pathian hi chu a ropui a ni' tiin twitter-ah a ziak. Minute 87-naah Son a rawn tlan lut chauh a, chutichung chuan South Korean player hian Moura hattrick siamna tur a rawn la siam sak hman tho.

Tottenham manager Mauricio Pochettino chuan, "Football hi chu team pumpui thawhrah a ni a, kan result-ah hian ka lawm takzet a ni. Man City nena inkhelh ṭuma Kane leh Alli te an inhliam avangin loh theih loin player thar luhtir a ṭul a, hun harsa karah pawh ka player-te an puitling hle," tiin a sawi a, an stadium thar Tottenham Hotspur Stadium-a inkhelh nuam a tih thu a sawi lang bawk.

VAR awm lo, United vanneihna

Manchester United-in Old Trafford-ah West Ham an mikhual a, London club lakah an khel ṭha lo a, VAR awm loh leh goalkeeper David de Gea chet ṭhat zarzoin 2-1 in hnehna an chang.

West Ham hian Felipe Anderson hmangin goal khung hmasaah an inngai a, amaherawhchu offside vangin pawm a ni lo. Replay aṭanga en let erawh chuan Diogo Dalot vangin Anderson hi a 'onside', VAR chu hman ni tawh se goal-ah pawh a ni ngei ang.

United tan minute 19-naah Juan Mata chuan box chhung chiahah Robert Snodgrass lakah penalty hlawhchhuakin Paul Pogba chuan a khung a. Replay thlirlet erawh chuan referee hian penalty pe ta lo pawh ni se an dar leh dar innek an nih avangin Spanish midfielder leh United tan han vui chiam a rem lo.

Second half ṭantirhah West Ham an nawr na lehzual a, De Gea leh Pogba te fimkhur tawk loh zarah chance insiamin Anderson chuan minute 49-naah siphurh a sut. United-in chak duhin Marcus Rashford, rawlthar forward Mason Greenwood leh Andreas Pereira te luhtir mah se inkhel an thunun thei lo.

Amaherawhchu Anthony Martial chuan ball ṭha hmu fuhin Ryan Fredericks lakah penalty a hlawh chhuak a, Pogba-a'n chakna goal khung nan a hmang. Hammers manager Manuel Pellegrini chuan United player hi a offside niin a sawi a, hetah erawh replay en letin referee thutlukna a dik thung.

West Ham manager Manuel Pellegrini chuan, "Ball kan chang tam a, goal chance pawh kan nei a, vanneihna chiah kan nei lo. VAR hmang tawh ilang chuan 1-0 in kan chak thei hial ang. Referee-in tihsual an nei a, chutihrualin an thutlukna erawh ka dem lo, an tihsual kha thutlukna har tak vek a ni a, VAR erawhin a pui thei ang," tiin an vanduai thu a sawi.

Hammers tan substitute Michail Antonio chuan crossbar a pet per bakah a head ṭha zet chu mak takin De Gea-a'n a dang hman a, United vanneih zia hi an manager meuh pawhin a pha lo.

Manchester United manager Ole Gunnar Solskjaer chuan, "Keini aiin an khel ṭha zawk. Inkhel entu chuan kan thusawi hi min ṭawm ang. Khawvela keeper ṭha ber zinga mi kan nei a, a goal tur a dan kha a awihawm loh hial zawk. Chutihrualin palina kan nih phak phawt chuan kum a vei hunah tumahin kan inkhelh dan hi an ngaihtuah zui lo ang," tiin point thum hlawhchhuah chu a pawimawh ber a nih thu a sawi.

April 12, Zirtawpni
Leicester City 0 - 1 Newcastle United
NEW : Ayoze Perez 32'
April 13, Inrinni
Tottenham Hotspur 4 - 0 Huddersfield Town
TOT : Victor Wanyama 24'; Lucas Moura 27', 87', 90'
Brighton & Hove 0 - 5 AFC Bournemouth
BOU : Dan Gosling 33'; Ryan Fraser 55'; David Brooks 74'; Callum Wilson 82'; Junior Stanislas 90'
Burnley 2 - 0 Cardiff City
BUR : Chris Wood 31', 90'
Fulham 2 - 0 Everton
FUL : Tom Cairney 46'; Ryan Babel 69'
Southampton 3 - 1 Wolverhampton
SOU : Nathan Redmond 2', 30'; Shane Long 71'
WOL : Willy Boly 28'
Manchester United 2 - 1 West Ham United
MAN : Paul Pogba 19' (P), 80' (P)
WES : Felipe Anderson 49'