Djokovic-a'n Nadal hmachhawn inring

Tun kar aṭangin tennis clay court season inelna lian an nei ṭan dawn a, world number 1 Novak Djokovic chuan French Open final a khel a nih chuan Rafael Nadal hneh theih ngei a duh thu a sawi.

Serbian tlangval hi Grand Slam hnuhnung pathumah a champion vek a, major title pali kawl kim tur chuan Paris-ah ropuina chan leh a ngai. Mahse, 'King of Clay' tia hming lem an pek hial Nadal a awm avangin a awlsam dawn lo.

Grand Slam vawi 15 champion tawh Djokovic chuan, "French Open final-ah Nadal nen kan intawng a nih chuan tun season chhunga match ropui ber pakhat a ni ang," a ti, player ropui pahnih hi an intawng leh a nih chuan vawi 54 an intumna tur chiah a ni ang.

Roger Federer pawh clay court-ah inlan a tum a, 2015 hnua a vawi khat nan French Open a khel leh dawn tihna a ni. Swiss star hi a chesual viau a nih ngawt loh chuan nomawi chawi thei tura rinkai zingah a tel ang.

French Open inbuatsaihna tournament pakhat Monte Carlo Masters chu tun kar aṭang hian khelh a ni dawn - Djokovic leh Nadal te pawh an inlan ang.