Chennai Super Kings chakna Imran Tahir

Imran Tahir chuan Pa­thian­ni zan khan Kolkata Knight Riders lakah run 27 lek pe chungin wicket li a la a, Chennai Super Kings chu wicket ngain hnehna a chanpui.

KKR hian over 20-ah run 161 siamin wicket riat an hloh a, opener Chris Lynn chuan run 82 ngawt vaw chhuak mah se amah vawm out-tu Tahir lakah batsman dang an che hleithei lo a, puitu a nei ṭha tawk lo.

Chennai tan opener Shane Watson chu run ruk lek siamin out mah se Suresh Raina chuan run 58 rawn siama a tawp thleng damin a team a rawn pui ṭha viau.

CSK hian over 19.4-ah an target hi an umpha a, wicket nga chiah an hloh - run 31 siama a tawp thleng dam Ravindra Jadeja hming lam hmaih a thiang lo.

Pathianni zan inkhel dangah Sunrisers Hydera­bad an mualpho a, Delhi Capitals chuan run 39-in an hneh. DC hi bat hmasain over 20-ah run 155 an tlin a, wicket sarih an hloh.

Delhi run siam zat hi um huphurhawm lo tak niin lang mah se Sunrisers-in DC bowler Kagiso Rabada an ngam lo a, South African bowler hian wicket li a rawn la. DC-in run 116 chiah siamin an out vek a, over 18.5 bak an daih lo.