Thawnthu hlui thai reh a ni ta

Pathianni zana Liverpool leh Chelsea an intawn hmaa sawi hlawh ber chu kum 2014 thil thleng kha a ni a, Chelsea laka Steven Gerrard tawlhthluk vangin Liverpool-in nomawi an beiseina a thamral.

Anfield-a team pahnih intawn hmain Chelsea-in twitter lamah Stevie G tawlhthlu lai video an tarlang a, "Chelsea leh Liverpool chungchang kan sawi em ni?" tiin Reds fans thinurna an chawk tho. Mahse, Pathianni zan inkhelh zawha hlim zawk erawh Liverpool an ni a, an mikhual Chelsea hi harsatna tawk loin 2-0 in an hneh.

Kum 2014 ang thoa Liverpool inelpui Manchester City an tawlhthlu duh bik lo a, an mikhualna ramah Crystal Palace chu 3-1 in an hneh ve bawk. Premier League table chung berah Liverpool an awm chhunzawm zel a, match khata khel tlem zawk City hian point hnihin an thlau mek.

City phawt

Pathianni zanah Liverpool aiin Manchester City an inlan hmasa zawk a, Jurgen Klopp chuan, "Chelsea nen kan inhmachhawn hma khan kan inzawh hmasak ber chu 'City dinhmun eng nge?' tih a ni," tiin a sawi.

Team pahnih inum boruak a sang tih hai rual a ni lo a, Klopp leh a naute inkhel tura an inbuatsaih lai hian City hian goal khat an khung tawh a, Reds an inlan meuh chuan 3-1 in an chak fel der tawh. City tan Raheem Sterling chuan goal hnih a khung a, English forward goal khung hi Palace-in Luka Milivojevic freekick hmangin chhanglet ṭhen mah se Gabriel Jesus chuan minute 90-naah chak nemnghehna a khung.

Pep Guardiola nauten harsatna nei loin hnehna an chang a, Liverpool tan hnehna chan loh chuan match khata khel tlawm zawk City tan kawng zau tak a inhawng dawn.

SalalalaaSalaahh

Anfield-a inkhelh hmain Liverpool-in April 15, 1989-a 'Hillsborough chhiatna' a thi mi 96 te pualin hun an hmang. An hlapui 'You'll Never Walk Alone' sa dup dup bawkin stadium chhung boruak chu thua sawifiah theih a ni lo.

Reds-in an beisei goal an hmu thei lawk lo chungin inkhel erawh a nung ṭha hle, second half-a goal hnih an hmuh meuh chuan 'an thawm mitdelte hriat khawpin' tih ang mai a ni! Reds tan hian Sadio Mane chuan minute 51-naah Jordan Henderson-a ball pek duhthusam chu ṭha zetin a tauh lut a, tun season-ah inelna hrang hranga goal 21 a khungna a ni nghal.

Anfield-a player langsar ber erawh Mohamed Salah a ni. Goal hmahruai an khung aṭanga minute hnihna lekah Egyptian forward hian yard 25 vela hla aṭangin goal chung kil sirah a thlawh lut a, thawm chu ring tak a ni. Tun season-a Salah goal 22-na hi a mawina piah lamah hriat reng tlak a ni - Chelsea laka phuba lakna goal a ni a, nomawi an chawi zui a nih ngat phei chuan Reds champion-na 'goal' zingah sawi tel a ni reng tawh ang.

Khawiah nge Hazard?

Eden Hazard-a'n a team hnehna chanpui zo lo mah se a thiamna erawh hmuh hmaih tur a awm lo a, vawi hnih ngawt chu goal khungna chance duhawm tak a nei.

Belgian forward hian a hun neih hmasak zawkah ṭha zeta tlan luta, ball a dawn hnuah Alisson kap karah a pet a, mahse a vanduai ṭum a ni a, post a tih per. Hazard hian chance duhawm dang a nei leh nghal a, mahse hnai set sawt aṭangin Reds keeper manto Alisson chuan a dang hman - Chelsea-in chance duhawm dang sawi tur an nei tam lo.

Blues fans tana pawi ber erawh season thara Champions League khelh an beiseina a chau sawt a, Real Madrid laka Hazard chan turin kawng a inhawng zau sawt tihna a ni bawk.

Inkhel chhehvel
• Raheem Sterling-a'n goal hnih a khung kha City tan khualmuala goal hnih a khungna hmasa ber a ni.
• Kevin de Bruyne-a'n Sterling goal hmasa zawk a siamsak kha Premier League-ah ni 336 hnua assist a neih leh hmasak ber a ni.
• Gabriel Jesus-a'n City tan tun season-ah inelna hrang hrangah goal 19 a khung a, minute 112 dana goal khung zel ang a ni.
• Palace captain Luka Milivojevic chu tun season-a City laka khualmual leh mahni muala goal khung thei awmchhun a ni.
• Chelsea hi Premier League-a khualmuala big six an hmachhawn hnuhnung parukah an tlawm vek a, goal 16 an chhuah.
• Liverpool-in tun season Premier League-ah vawi 26 hnehna an chang ta a, 2013-14 a Brendan Rodgers hoa an record an nihrual. Top flight football-a hnehna an chan tam ber erawh 1978-79 kha niin vawi 30 hnehna an chang.
• Salah goal kha January 2018-a Manchester City laka goal a khung hnua box pawn aṭanga a goal khung hmasak ber a ni.
• Season hmasa ṭantir aṭanga chhiarin Salah-a'n Premier League-ah goal 66 a khung tawh a, ani aia khung hnem an la awm lo.
• Klopp-a'n Liverpool-a kaihhruai vawi 200-na a ni. Hetih chhung hian vawi 112 an chak a, vawi 52 draw result neiin vawi 36 an tlawm.
• Callum Hudson-Odoi kha kum 18 leh ni 158 mi a ni a, Chelsea tana Premier League match thum a zawna bul ṭan thei naupang ber a ni.

Hmabak
Date Liverpool fixtures Date Man City fixtures
21-Apr Cardiff (A) 20-Apr Tottenham (H)
24-Apr NIL 24-Apr Manchester United (A)
26-Apr Huddersfield (H) 28-Apr Burnley (A)
05-May Newcastle (A) 04-May Leicester (H)
12-May Wolves (H) 12-May Brighton (A)
––––––––––––––––––
A = Away; H = Home