Ronaldo ten semi-final thleng dawn em?

Juventus-in Cristiano Ronaldo an lakluh chhan ber nia lang chu Champions League-a champion an duh vang a tih theih a, zanin hi an la fuh reng em tih hriatna pakhat a ni ang. Zanin dar 12:30 hian Juventus Stadium-ah Bianconeri-in Ajax an mikhual dawn a, first leg-ah team pahnih hi 1-1 in an inhnehtawk.

Italian champion tana goal khungtu Ronaldo chu kartawpa SPAL an hneh loh ṭumin hahdamna hun pek a ni a, Ajax hmachhawn turin a inpeih ang. Kum 34 mi Ronaldo hian Juventus tan Serie A-ah goal 19 a khung tawh a, khung tam lamah goal 22 khung tawhtu Fabio Quagliarella (Sampdoria), Krzysztof Piatek (AC Milan) - 21 leh Duván Zapata (Atalanta) - 20 te a tluk lo.

Amaherawhchu, Portuguese forward hian season bul a ṭan fuh loh bakah inhliam vanga inlan loh a neih bawk avangin top scorer a ni lo hi dem theih a ni lo. Champions League-ah pawh season dang a pha lo a, goal nga chauh la khung. Chutihrualin chik lehzuala inkhel thlir chuan Ronaldo pawimawh zia an hria, Ajax an tum theihna tura Atletico Madrid laka a hattrick siam ringawt pawh hahipa fak theih a ni.

Massimilano Allegri tan Ronaldo hi thlamuanpui tham ni mah se Giorgio Chiellini, Martin Caceres, Emre Can leh Douglas Costa te chu hliam vangin an khel thei dawn lo. Ajax pawhin left back pawimawh Nicolas Tagliafico chu hrem vangin an chhawr thei dawn bik lo. Chutihrualin rawlthar rual awmna Dutch club hi dah hniam a thiang lo - Santiago Bernabeu-a Real Madrid hnehtute an te an ni a, treble champion thei dinhmunah an la ding bawk.