FIFA hnenah Cardiff insawifiah

Cardiff City chuan Emiliano Sala man pound maktaduai 15 chungchanga Nantes nen an inhmuh thiam lohna a an ṭan chhan document pawimawh chu nimin khan FIFA hnenah an thehlut.

Premier League club hian an club record ni turin Argentine striker hi an lalut a, amaherawhchu Sala hi January thla khan thlawhtheihna chetsualnaa a thih avangin Welsh club hian French club hnena an pawisa pek tur ang pek an tum lo a, hun tiam hmasa ber an bawhpelh avangin Ligue 1 club Nantes hi FIFA hnenah an zualko.

Football thuneitu sang hian Thawhṭanni thleng kha Cardiff tan hian insawifiahna hun an siam sak a. Cardiff chuan, "Cardiff City FC chuan vawiin hian February 26, 2019-a FC Nantes puhna chhanna chu kan thehlut," tiin nimin khan thuchhuah an siam. Hun tiam chhungin Premier League club-in an thehlut hman tihna a ni.

Nimin thil thlen hma hian Cardiff chuan Nantes nen inremna zawnga inbiak an rawt a, FIFA president Gianni Infantino pawhin an inrem theih a beisei thu a sawi. Amaherawhchu tuna a lan dan chuan FIFA-in thutlukna a siam a ṭul ta ni.

Cardiff hian Sala hi Premier League player ni tura an la ziah loh avangin an la lei fel lo niin an sawi a, Nantes erawhin FIFA dan ang thlapin tih tur ṭul ang an zawh fel hman thu an sawi thung.