Real Madrid an tho thei lo

Zinedine Zidane an koh kir hnuah meuh pawh Real Madrid-in insiamṭhat zai an rel thei lo a, an mikhualna ramah Leganes nen goal khat ve ve khungin an inhnehtawk.

Leganes hian Jonathan Silva hmangin minute 45-naah goal hma­hruai an khung zawk hial a, mahse tun hnaia 'form' tak Karim Benzema hmangin Real Madrid hian second half-ah an chhanglet.

Madrid khaw club hian an match hnuhnung pathumah vawi khat chiah hnehna an chang tihna a ni a, Zidane-a 'magic' hmuh turin a la awm rih lo.

Real hian table-ah erawh pa­thumna dinhmun an hauh chhunzawm zel a, pangana Getafe-in an phak lohna hi point 10 lai a la nih avangin Champions League khel tura an dinhmun erawh a derthawn phah lo.

Benzema bawk chu

Mualneitu Leganes tan Jona­than Silva chuan yard 18 vel leka hla aṭangin minute 45-naah goal hmahruai a khung a, Real an hawihai.

Mahse, second half minute 51-naah Real tan Benzema chuan si phurh a rawn sut a, goal dang erawh a lut tawh lo - Zidane hnuai­ah Benzema a vul zel thung. French striker hian Zidane enkawlna hnuaia match nga an khelhah goal nga a khung tawh a, tun season-a inelna hrang hrangah goal 27 khungin league-ah goal 18 a khungna a ni.

Real hian Zidane hnuaia match nga an khelhah vawi thum hnehna an chang a, vawi khat an khingpui inhnehtawkpuiin vawi khat an tlawm - Celta Vigo an hneh ṭum tih lohah chuan Benzema hian goal a khung vek.

Zidane a lawm lo

Leganes khelmuala hnehna chang ngei tura beisei Real Madrid-in hnehna an chang zo lo a, coach Zidane a lungawi thei lo. French manager chuan, "First half-a kan khelh dan khan minti lawm lo.

"Second half-ah kan insiam­ṭha a, mahse kha aia ṭha zawka khel thei kha kan ni. Lawmna tur a awm lo a, mahse team hma­chhawn hautak zet kan tum avangin insiamṭhat kan ngai," a ti. Real hian La Liga, Copa del Rey leh Champions League-ah beisei tur an nei tawh lo vek a, hei vang hian player zingah phurna a awm tawh lo niin a lang.

Zidane chuan, "Theihtawp chhuah tal kan tum tur a ni. Kan player neih dan enin hei aia ṭha zawka khelh beisei ngam tur kan ni a, match ruk la awmah theihtawp kan chhuah a ngai dawn a ni," a ti.

Buaina ngai Bale

Wales international Gareth Bale chu hun tawp hnaih lamah bench aṭanga luhtir ve chauh a ni a, khelmualah minute 12 hun a hman chhungin vawi li vel bak ball a tawk fuh hman lo.

Zidane rawn kir ṭantirah Bale hian bul ṭan nghal mah se tun hnaiah erawh bench lamah bawk a kir leh ta a, Leganes nena an inkhelhah pawh khel­mualah tawi khawmuang loin dressing room a pan nghal. French manager Zidane chuan a thutlukna sawifiahin, "Bale chungchang hi min zawt reng ang a, chhanna ngai zel ka pe ang che u. He squad-ah hian player pawimawh tak a ni.

"Zaninah khan thil thlak danglam ka duh avangin bench-ah ka ṭhuttir a, chu zawng chu buaina chu a ni mai e," a ti a, chhuak mai tur angin Bale an sawi ṭan leh ta.