UEFA Champions League Guardiola leh Man City hmalam hun hriat zan
Manchester City-in Pep Guardiola hnuaia Champions League an thlen san ber chu quarterfinal a ni a, tun season-ah an tlakna ngaiah bawk tla thei dinhmunah an ding.
Zanin dar 12:30 hian Etihad Stadium-ah Man City-in Tottenham an mikhual dawn a, London club hi first leg-ah 1-0 in an chak. Team ṭha zawka ngaih Pep-a hote hi siphur saa khel tur an nih avangin inkhel hmuhnawm tak thlir tur a awm ang.
Thawnthu hlui
Season liam ta khan Manchester City chuan UCL quarterfinal-ah Liverpool chu Anfield-ah 3-0 ngawtin an hneh lo. Reds hian inkhelh ṭantirh darkar chanve chu thunun hlakin Mohamed Salah, Alex Oxlade-Chamberlain leh Sadio Mane te hmangin minute 31 chhungin 3-0 in hma an hruai hman.
Man City hi second half-ah insiamṭhain inkhelh pumpuiah 62% ball possession an nei pha tho a, goal erawh an khung lo. Pep-a hote an nih miau avangin si thum phur sa Man City-in beiseina hloh loin Reds an hmachhawn a, minute hnihna lekah Gabriel Jesus hmangin an khung nghal.
City hian inkhel thununin goal attempt vawi 20 an nei a, ball possession pawh 64% nei pha mah se an penalty beisei an pek loh avangte leh an goal mamawh a san hret avangin Liverpool-in Mohamed Salah leh Roberto Firmino te hmangin an khung ta zawk.
Minute 180 an khelh zawh meuh chuan chak zawk tura ngaih Man City chu 5-1 zetin an chak lo a, Pep Guardiola hnuaia beiseina nena an thlir Champions League nomawi chu Europe-a tawnhriat nei ṭha zawk Reds lakah a thamral.
Mellung thar
Manchester City hian Manuel Pellegrini hnuaiah semifinal an thleng tawh a, an club history-a an thlen san ber a ni. Chutihrualin City hian Pep-a hi an dah san em avangin Pellegrini manager a nih lai rengin an lakluh thu an tichiang a, hetihlai hian Man City hi tun season ang thoin 'quadruple' beiseina nei an ni.
City hian Barcelona dinhmun sang lehzuala dahtu Pep Guardiola chu an lalut ta ngei a, amaherawhchu an beisei ang result erawh an la hlawh chhuak lo. Spanish manager season khatnaah City hian knockout stage lut mah se Monaco an hneh lo a, kum hnihna chu Liverpool laka an chak loh kha a ni.
Tun season-ah mellung thar phun an tum a, quarterfinal-a an hmachhawn Tottenham Hotspur hi fixture pawh hlim chuan harsa tura ngaih a ni lo a, semifinal lut tura ngaih an ni. Tunah erawh first leg-ah goal an chhuah a, awlsam nia ngaih kha a harsa ta.
City duh ber UCL
Manchester City-in nomawi pali zinga an duh ber chu Champions League niin a lang a, Spurs lakah an ṭhat dan berin an inrem dawn. City player zingah Fernandinho leh Oleksandr Zinchenko te dinhmun a chiang lo a, player dang zawng an dam ṭha.
Pep Guardiola chuan, "Eng nge thleng ang tih min zawh chuan - semifinal kan lut ang, tih hi ka rin dan nghet tak a ni. First leg kan khelh zawh khan kan rilru a dam thlap a, kan khelh dan ka thlir let pawh khan a lawmawm ka ti. Ka thlir dan a dik lo pawh a ni thei a, ka ngaihdanah chuan semifinal kan thlen ngei ka ring," tiin a inringtawk hle.
Man City hian Liverpool an hmachhawn ṭum khan 3-0 a nih hnuah an nawr let na viau a, scoreline thlir loa inkhelh dan chauh thlir chuan 'comeback' ngei tura ngaih theih lai a awm. Tun ṭumah erawh goal khat chauh a ni a, an muala khel tur an nih bawk avangin pawisa thapna lamah chuan City hi chak tura rin hlawh zawk an ni.
Kane tel loin
Tottenham Hotspur-in an thiampuipa Harry Kane an chhawr thei lo a, England captain tel lo hian League Cup semifinal first leg-a an hneh tawh Chelsea hneh loin an tla.
Spurs manager Mauricio Pochettino chuan, "Mi tam tak chuan min ṭawmpui lo mai thei, mah se kan tan chuan tun thlenga Champions League-a la dam hi 'bonus' a ni. First leg-ah 1-0 in chak mah ila khawvela team ṭha ber zinga mi Man City hi Premier League leh Champions League champion tura rinkai an ni," tiin dinhmun ṭha zawkah a indah duh lo.
Tottenham hian Kane bakah hian Serge Aurier, Eric Dier leh Erik Lamela te an chhawr thei dawn lo a, Delle Alli leh Harry Winks te dinhmun a chiang lo bawk. Amaherawhchu Pochettino naute hi an tlo a, Christian Eriksen leh Son Heung-min te an kawl a, kartawpa hattrick siamtu Lucas Moura te an la awm bawk avangin an beisei ngam loh semifinal thleng thei an ni.
Pochettino hote hian Inrinni tlai dar 5:00-ah Man City hi Etihad Stadium-ah an hmachhawn lehnghal dawn a, Champions League leh Premier League nomawi beiseina tihtawpsak theitu an ni. Liverpool ṭantute chuan season ṭantira an elpui hi an ṭan thar ang.
UCL-a Pep Guardiola sulhnu
2008-09 Barcelona Champion
2009-10 Barcelona Semifinal
2010-11 Barcelona Champion
2011-12 Barcelona Semifinal
2012-13 -
2013-14 Bayern Munich Semifinal
2014-15 Bayern Munich Semifinal
2015-16 Bayern Munich Semifinal
2016-17 Manchester City Round of 16
2017-18 Manchester City Quarterfinal
Season Manager Thlen chin Hneh loh/Tluk loh
2011-12 Roberto Mancini Group Stage - 3rd Bayern Munich & Napoli
2012-13 Roberto Mancini Group Stage - 4th Borussia Dortmund, Real Madrid & Ajax
2013-14 Manuel Pellegrini Round of 16 Barcelona
2014-15 Manuel Pellegrini Round of 16 Barcelona
2015-16 Manuel Pellegrini Semifinal Real Madrid
2016-17 Pep Guardiola Round of 16 Monaco
2017-18 Pep Guardiola Quarterfinal Liverpool
Champions League Quarterfinal
First leg
April 9, Thawhlehni Zan
Tottenham Hotspur 1 - 0 Manchester City
TOT : Son Heung-min 78'
Liverpool 2 - 0 FC Porto
LIV : Naby Keita 5'; Roberto Firmino 26'
Second Leg
Zanin Inkhel Tur
Manchester City 12:30 AM Tottenham Hotspur
FC Porto 12:30 AM Liverpool