Pro Volleyball Tuichangral inlan hun

Suzuki Gixxer Pro Volleyball League chu zanin dar 8:00-ah khelh chhunzawm a ni dawn a, season hmasa finalist Tuichangral leh Chhinga Veng Spikers an inhmachhawn ang.

Team pahnih hian PVL-ah tawnhriat an nei ṭha, final khel tawh ve ve niin Hunthar Veng an ngam lo thung. Senior team an inkhelh hma hian Under 18 team an inlan hmasa leh phawt dawn a ni.

A zawnin

Volleyball hi thingtlang mi tan pawh ṭha takin a khelh theih tih lanchhuahtirtu chu Tuichangral hi an ni a. Anni hian a season hnih nan a zawnin Pro Volleyball an khel dawn a, Aizawl pawn team zingah tualchhung volleyball inelna sang bera inlan zawn thei hmasa ber an ni.

An player neih lai bakah Maubawk aṭangin Lalrinchhana an lalut a, tawnhriat ngah Lalnunfima leh Malsawmsanga te an la kawl bakah Haryana aṭangin Northern Railway player Jaideep Sandu an seng lut bawk. Season hmasa a Shivendra hmangthiam team hian feet 6 leh 6 inches-a sang Jaideep hi eng tiangin nge an hman dawn tih chu hmuh a châkawm hle.

Chhinga Veng

Kum 2017 khan Chhinga Veng hian Pro Volleyball an khel tawh a, hneh loh nei loin final an lut. Mahse a hmawr an bawk fuh lo a, season hmasa khan tualchhung volleyball inelna sangah hian an inlan lo - kuminah chuan team thar an ni. Tun season-ah bul an ṭan fuh nghal a, season opening tournament-ah an champion.

PVL an khelh hmasak ṭuma an hman thiam Mandeep Singh an la kir leh a, team boruak pawh a siam ṭhain an phur phah hle. Hunthar aṭangin 2018 Pro volleyball best blocker Lianmawia, Police player ṭha Joel Zodinsanga leh ITI player Lalnunpuia leh Lalremruata an seng luh bawk avangin nomawi chawi an tum ngam ang.