Auba sam a thar; Arsenal an thar ve lo!

Arsenal captain Pierre-Emerick Auba-meyang-a'n 'hair style' thar a neih avangin sawi a hlawh a, khelmuala a khelh dan erawh sawi zui tur a awm lo - Liverpool lakah a hun tam zawk left back puih nan a hmang!

Inrinni zan khan Arsenal chuan Premier League-ah Liverpool an mikhual a, 3-0 in an tlawm. Reds-in Premier League nomawi hum thei tawh lo mah se top four-a season khar an la tum reng tih erawh thiltih hmangin an lantir.

Liverpool tan Diogo Jota chuan goal hnih a khung a, Mohamed Salah chuan goal khat a khung ve bawk. Salah hian tun season inelna hrang hrangah match 41 khelin goal 26-a khung a, assist vawi li a nei. Premier League-a match 150-a khelhna a ni a, goal 93 leh assist 36-a nei tawh!

DioGOAL

Emirates Stadium-ah mikhual team an tlangnel hle. Liverpool-in goal khung an tum a, Arsenal-in a ven lam hna an thawk thung - hetichung hian Diogo Jota lan hma loh chu Reds-in goal an khung thei lo.

Minute 61-naah Jota hi Andy Robertson thlakin a lut a, khelmualah minute thum bak hun a hmang hman lo tihin a tauh lut nghal. Reds an phur thar a, Salah chuan minute li hnuah an goal hnihna a khung.

Jota-a'n a duhtawk mai lo. Minute 82-naah a khung leh a, Portuguese forward hian tun season-ah hliam vanga league match 13 chiah a la khel chungin goal riat a khung ta - pound maktaduai 45-a Liverpool-a zawm tirha to titute khan to an ti tawh lo ang.

Rintlak Arnold

England boss Gareth Southgate-a'n international break-ah Trent Alexander-Arnold a ko duh lo a, kum 22 mi defender hian Euro 2020-a hmun chang tur chuan club-ah khelh ṭhat a mamawh thu a sawi.

Arnold-a'n thiltih hmangin Southgate-a chhang nghal a, Jota goal hmasa zawk chu ṭha zeta a assist-a ni a, Jota goal hnihna luh theih nan a thawh hlawk hle bawk.

Southgate lo sawisel tawhtu Liverpool manager Jurgen Klopp chuan, "Trent hian season a hmang ṭha lo anga sawi an awm a nih chuan an ngaihdan a dik loh thu hrilh ka duh. Southgate-a ngaihdan ka thlak thei lo bawk," tiin a sawi.

Bei zel ang

Beisei anga season hmang lotu Liverpool an ṭhat dan berin an khel leh tawh a, top four lama an elpui Chelsea leh Leicester City an tlawm bawk avangin Reds tan chuan kar duhawm a ni. Reds hian Thawhlehni zanah Champions League quarterfinal first leg khel turin Real Madrid an lenchilh zui dawn.

Klopp chuan, "Keini kan chak a, kan elpuite an tlawm zel bawk a ngai a, mahse, nawr ve reng erawh kan tih tur a ni - chu chu zaninah kan ti a, kan dinhmun erawh a la him lo.Theihtawp chhuaha kan beih zel a ngai a, kan bei zel bawk ang," a ti.

Liverpool tana lam hmaih thiang lo pakhat chu Fabinho-a ni. Brazilian midfielder hian tun season-ah a hun tam zawk chu centre back inhliam Virgil van Dijk, Joe Gomez leh Joel Matip-te hmun ruak luahin a hmang a, a nuam tihna ber midfield-a a khelhin a team tana danglamna a thlen theihzia a lang leh ta.