Copa del Rey champion Real Sociedad

Real Sociedad chuan Inrinni zan khan Seville-ah Athletic Bilbao 1-0 in an hneh a, kum 34 hnuah Copa del Rey-ah an champion. Final-a goal awmchhun hi Mikel Oyarzabal-a'n penalty aṭanga a khung a ni.

Tun ṭuma Copa del Rey final hi 2019-20 season kha a ni a, kumin final hi April 17-ah khelh a ni dawn. Tun ṭuma chak lo Athletic Bilbao leh Barcelona te an inkhel dawn.

Final chu

Copa del Rey final-ah Real Madrid emaw Barcelona emaw an tel lo a, boruak a 'hot' tawk lo. Chutihrualin tun ṭuma nomawi inchuhtute hi Los Blancos hnehtu Bilbao leh Catalan club hnehtu Sociedad te an ni.

Final hi ruahmanna hmasaah chuan April 18, 2020-a khelh tur ni mah se Covid-19 vangin April 3, 2021-ah kheh a ni chauh. Inelna hi November 13, 2019-a khelh ṭan a nih tawh avangin khawvela inelna rei ber zinga mi a ni pha hial ang.

Goal khat chauh

La Cartuja, Seville-ah entu an awm lo a, team pahnih an inhnehtawk hle. First half-ah Bilbao defender Inigo Martínez ball pet chu Sociedad keeper Alex Remiro-a'n a dang ṭha takzet. Chutihrualin defender Martinez hian inkhelah hian VAR hmanga an en hnuah handball vangin freekick a chawi a, vanduai ṭum chu ni se penalty chawi thei a ni.

Second half-ah Inigo Martinez hian box chhungah Portu a ti tlu a, penalty a chawi bakah red card pek a ni. VAR hmanga enlet a nih hnuah Bilbao defender Martinez hian yellow card a chawi a, penalty erawh sut a ni lo. Sociedad captain Oyarzabal rawn pen chhuakin Spain international keeper Unai Simon a bum a, final-a goal awmchhun a khung.

Final-ah hian Sociedad tan Manchester City midfielder hlui David Silva chuan minute 85 chhung a khel a, Arsenal left-back hlui Nacho Monreal-a'n minute 90 chhung a khel bawk. Team pahnih hi April 7, Nilaini zan dar 12:30 hian La Liga-ah an inhmachhawn lehnghal ang.

Copa Del Rey Final - 2010 leh a hnulam
Season Champion Result Pahnihna
2009–10 Sevilla 2–0 Atlético Madrid
2010–11 Real Madrid 1–0 Barcelona
2011–12 Barcelona 3–0 Athletic Bilbao
2012–13 Atlético Madrid 2–1 Real Madrid
2013–14 Real Madrid 2–1 Barcelona
2014–15 Barcelona 3–1 Athletic Bilbao
2015–16 Barcelona 2–0 Sevilla
2016–17 Barcelona 3–1 Alavés
2017–18 Barcelona 5–0 Sevilla
2018–19 Valencia 2–1 Barcelona
2019–20 Real Sociedad 1–0 Athletic Bilbao

* Barcelona vawi 30 an champion tawh a, nomawi chawi ngun ber an ni.
* Barca hi Athletic Bilbao (23), Real Madrid (19), Atletico Madrid (10) leh Valencia (8) ten an dawt.