Man City-in champion an hnaih

Manchester City chuan Inrinni zan khan King Power Stadium an luhchhuah a, mualneitu Leicester City 2-0 in an hneh. Pep Guardiola hoten season li chhunga a vawi thum nan Premier League nomawi an chawi dawn a, hun rei nghah a ngai tawh dawn lo.

Champions League khelh inbeisei Foxes hmaah Man City-in team ṭha zawk an ni tih an lantir a, second half-a Benjamin Mendy leh Gabriel Jesus te goal khung hmangin hnehna an chang. Guardiola hote hi tun season-ah nomawi pali chawi thei dinhmunah an ding a, April 6, Thawhlehni zan hian Etihad Stadium-ah Borussia Dortmund nen Champions League quarterfinal first leg an khel ang.

International break laiin Man City-in an club record goal scorer Sergio Aguero contract pawhsei a nih loh tur thu an tichiang a, Foxes lakah hian Argentine forward Aguero-a'n bul a ṭan. Club legend Aguero hian tun season-ah a inlan tam loh avangin tun hma a pha lo a, Foxes laka a khelh dan thlir chuan Pep-a hote tan Aguero hmunruak hnawh khah hi a harsa dawn lo a, chutihrualin a sulhnu erawh sawi nep theih a ni lo thung.

Man City-in ball an chang hnem a, Fernandinho goal khung chu Aguero offside vangin pawm a ni lo. Kevin De Bruyne-a'n freekick aṭangin crossbar a pet per a, Riyad Mahrez-a goal khung tur chu keeper Kasper Schmeichel-a'n a dansak bawk.

First half injury time-ah Jamie Vardy a rawn lang a, kum 34 mi English forward hian goal ṭha zet khungah inngai mah se offside vangin pawmsak a ni lo. Second half-ah Man City bawkin inkhel an thunun a, goal an khung ta bawk.

Minute 58-naah Benjamin Mendy-a'n mawi zetin a pet goal. Minute 74-naah De Buryne, Jesus leh Raheem Sterling ten Leicester tlarhnung an ṭhiat a, Brazilian forward Jesus hian awlsam takin a khung. Leicester City an vannei a, Man City-in an khung belh tawh lo.

Man City manager Guar-diola chuan, "Inelna dang zawng aiin Premier League hi ka ngaina a, tunah chuan champion kan hnaih ta hle. Liverpool hi champion lai an ni a, nomawi kawltu an ni. Amaherawhchu kan chhuhsak ṭep tawh e," tiin a sawi.

Guardiola hote hian match 11-ah point sarih an hmuh chuan an champion dawn a, an hmelma Manchester United tan umphak a harsa tawh dawn a, champion lai Liverpool chuan an umpha thei tawh lo hrim hrim.