Juve leh Milan an chelh Inter Milan an sang fal ta

Serie A champion Juventus leh champion tum AC Milan ten Inrinni zan khan an khingpui lakah hnehna an chang zo lo ve ve a, point khat bak an hmuh belh theih lo - an elpui Inter Milan erawhin hnehna an chang thung.

Romelu Lukaku goal khat hmangin Inter chuan khualmualah Bologna 1-0 in an hneh a, Milan erawh an mikhual player 10 a khel Sampdoria nen 1-1 in an inhnehtawk. Old Lady pawh Torino mualah 2-2 in an in inhnehtawk ve bawk.

Champion rim a nam

Season hmasa a tawp khan Antonio Conte-a'n atan chuan pahnihna nihin awmzia a neih loh thu a sawi a, champion ngei a duh thu chiang takin a sawi. Italian manager hian a duhna ti hlawhtling turin kawng dik a zawh mek.

Lukaku-a'n minute 31-naah keeper Federico Ravaglia dan hman lohin a tauh lut a, a hnuah striker Lautaro Martinez chuan hun ṭha nei ve leh mah se goal ban a tih per, an goal an venhim avangin point thum hlu tak an hlawh chhuak. Conte naute hi a zawnin league match kua ngawtah an chak ta, point 68 hmuin pahnihna Milan aiin point riat ngawtin an sang fal tawh. Kum 2009-10 season hnua a vawi khat nan league title an la ngei dawn niin a lang.

Inter manager Conte chuan, "Hmun tiam thleng turin kawng dik kan zawh zel a, a hmawr kan bawk ṭep tawh. Chutihrualin inthlahdah thei kan la ni lo tih erawh kan hriat chian a ngai, tihsual theih tam tak a la awm. "Bologna khan player an nei ṭha a, an theihna zawng zawngin an khel ṭhin bawk. Theihtawp chhuah ṭhin player hmachhawn chu engtik lai mahin a awlsam ngai lo, mahse keini lam pawhin thapui kan thawh avangin a lawmawm," a ti.

Nomawi a keh?

Cristiano Ronaldo-a'n minute 79-naah ṭha takin a tauh lut a, mahse siphurh sutna goal chauh a la ni. Khualmualah chakn goal an khung zui theih loh avangin point hnih an hloh, hmahruiatu Inter an phak lohna chu point 12 zet a ni ta.

A zawnin season kua ngawt league champion an ni a, kuminah erawh Serie A roreltu an nihna chu a tawp dawn ta niin a lang. Juventus captain Giorgio Chiellini chuan a sang zual pali zinga tel an tum thu a sawi ta. Old Lady defender Chiellini chuan, "Tihsual kan ngah ṭhin hi a pawi lai chu a ni, kan khingpui lamin min hrem nan an hmang zel si. Tunah hian a sang thei ang ber thlen kan la tum, chu chu Champions League khelh phak a ni ang.

"Palina kan nih phak chuan season chhia a ni hran lo ang, league bakah hian Coppa Italia final khelh hmabak kan la nei bawk," tiin a sawi a, an duhthusamin season hmang lo mah se lungawina an zawng hram hram tihna a ni.

Andrea Pirlo pawhin ball inpek sual an ngah thu a sawi. Italian manager hian season tharah a hna ngai a thawh chhuanzawm rih a rinawm a, chutihrualin an duh ber UCL an lak loh bakah league title an hloh a nih chuan insiamṭhat a ngai hle ang.