Hnehna nen Joel Embiid a lo kir

Ke rek hliam vanga match 10 a khelh loh hnuah Joel Embiid nimin zing khan a lo kir leh tawh a, point 24 rawn nei leh nghalin a team Philadelphia 76ers chu Minnesota Timberwolves lakah 122-113 in hnehna a chanpui.

Eastern Conference lamah 76ers hian hma an hruai chhunzawm zel a, regular season kal laiah vawi 34 hnehna an chang tawh - Brooklyn Nets nen an chak zat a inang chiah, conference champion tumin na takin an inum zel ang.

Nimin zing inkhel dangah Western Conference hmahruaitu Utah Jazz chuan Orlando Magic 137-91 in an hneh. Jazz tan Donovan Mitchell-a'n point 22 a nei a, a point neih zingah hian 3 points aṭanga a luh vawi ruk ngawt a tel.

Jazz hian chawlhlawk hmain 3 points vawi 18 an nei hman a, Golden State Warriors-in kum 2018 a record an lo siam tawh vawi 17 chu khumin NBA record thar an siam, tun hnaiah a zawnin vawi kua ngawt hnehna an channa a ni bawk.