Real tan Benzema'n a khung leh ta

Karim Benzema-a'n goal khung a ṭhulh thei lo - French striker hian Inrinni zan khan Eibar lakah goal khat a khung a, Marco Asensio goal khung nen an mikhual lakah 2-0 in an chak.

Real-in hnehna an chan avangin La Liga champion an beiseina chu an chhi nung ve zel a, hmahruaitu Atletico Madrid chu point thum chauhin an thlau tawh - nizana Sevilla lenchilhtu Atletico inkhel result a zirin an inthlauhna erawh danglam leh thei a ni a, he thu buatsaih lai hian result kan hre hman lo.

Barcelona chuan zanin dar 12:30-ah hian Real Valladolid an mikhual dawn thung a, Madrid ai hian match khata khel tlemin point khatin an hniam mek - zaninah an hmelma club hi tlanpel leh an tum ang.

La Liga inkhel ngaihven hlawh dangah Villarreal chuan 3-0 in Granada an hneh a, Champions League khelh phak an beisei ve zel - Yellow Submarine tan Gerard Moreno chuan hattrick-a siam a, goal hnih hi penalty aṭanga lut a ni thung.

Benzema chu

Real-in an mualah inkhel an thunun a, Marco Asensio chuan minute 41-naah goal hmahruai a khung a, Brazilian midfielder Casemiro siamsak a ni.

Minute 73-naah Benzema hun a her chhuak a, French striker hian Vinícius Junior hnen aṭanga a ball hmuh chu yard riat vela hla aṭangin a tauh lut - hun tawp thlenga goal dang lut loin Real an chak. Kum 33 mi Benzema hian tun season inelna hrang hrangah match 33 khelin goal 24-a khung tawh a, assist vawi ruk a nei bawk - a nep lo hle.

Real tan Asensio, Benzema leh Casemiro-te goal chu offside vanga pawm a ni lo a, Spanish attacking midfielder Isco chuan freekick aṭangin bar a tih per bawk.

Zidane 250

Real tan Eibar an mikhual hian danglamna tak a nei a, tun hnaia an coach neih hlawhtling ber tih ngam Zinedine Zidane hnuaia match 250 an khelh tlinna chiah a ni.

French coach hian match 250-ah vawi 165 ngawt chu a team hi hnehna a chanpui thei a, La Liga (1), Spanish Super Cup (2), Champions League (3), UEFA Super Cup (2) leh FIFA Club World Cup (2)-ah te a champion pui tawh. Kum 48 mi coach hian January 4, 2016 khan Real enkawl hna hi a thawk ṭan a, May 31, 2018 khan a bang. March 11, 2019-ah khan a lo kir leh a, an match hnuhnung 11-ah an tlawm tawh lo.

Real hi tun season-ah Copa del Rey round of 32 aṭangin Spanish third division club Alcoyano-in pet chhuak mah se Champions League leh La Liga nomawi beiseina an la nei mek.