PSG chak loh zanah Neymar hnawt chhuak

Paris St-Germain an champion ang a, team dang 19 ten pahnihna dinhmun an inchuh ang, tiin tun hnaiah Ligue 1 chungchang an sawi ṭhin. Tun season-ah erawh thawnthu a danglam mek - PSG tan nomawi humhim chu thil awlsam a ni dawn lo.

Inrinni zan Ligue 1 inkhelah champion lai PSG hi an elpui Lille lakah 1-0 in an tlawm. Paris khawpuia inkhelah mikhual team tan Jonathan David chuan minute 20-naah goal awmchhun a khung.

Hun tawp dawnah Neymar chu yellow card pahnihna hmuh vanga hnawhchhuah a ni a, Brazilian forward bakah hian Lille player Tiago Djalo chu hnawhchhuah a ni ve bawk a, hun a tawp meuh chuan player 10 ve ve an ni.

Season kal laiah PSG leh Lille an inum na hle, March thla khan French Cup-ah club pahnih hi intawngin Mauricio Pochettino nauten 3-0 in hnehna an chang - tun ṭumah erawh result a danglam ta.

Lille hian 2010-11 season hnua a vawi khat nan league title lak an beisei mek a, match 31 khelh tawh chinah point 66 hmuin hma an hruai mek, pahnihna PSG aiin point thumin an sang zawk; khelh hmabak pasarih an la nei.

PSG manager Poch chuan, "Keini aiin goal khung theihna hun remchang an insiam tlem zawk a, mahse a pawimawh ber goal an nei miau si. Point khat tal chu hlawh chhuah phu khawpin kan khel chuan ka hria, a hmawr kan bawk fuh lo kha a pawi," a ti.

French champion hian Nilaini zanah Champions League quarterfinal first leg khel turin Bayern Munich an lenchilh zui dawn, season hmasa UCL final-a an hneh loh paltlang tur chuan thapui an thawh a ngai ang - a harsa dawn tih a chiang.