Chak loh hnuah Carl Frampton a chawl

Northern Irish fighter Carl Frampton chuan WBO super-featherweight title inchuhna fight-ah Jamel Herring a ngam lo a, round ruknaah technical knockout hmangin a tlawm.

Vawi 31 fight-a hmachhawna a vawi thum nana tlawm Frampton hian boxing a chawlhsan thu a puang zui a, kum 34 mi boxer chuan, "He fight-ah hian ka tlawm chuan ka chawlh tur thu ka lo sawi tawh a, ka thusawi ang ngeiin ka awm dawn a ni," a ti a, "Kan inah haw a, ka nupui hmelṭha tak leh ka fate bula awm ka châk tawh a ni," a ti zui.

Kum 35 mi Herring hian Frampton hi vawi hnih ngawt a hnek tlu a, Dubai, UAE-a inhnekah hian Frampton-a team lamin an tlawm tih lantir nan towel an thehlut a ni.

The Jackal hming lem an pek Frampton hian WBA (Super) leh IBF super-bantamweight title chu 2014-2016 inkar khan a lo kawl tawh a, WBA (Super) featherweight title chu 2016 - 2017 inkar khan a kawl bawk.

A vawi thum nana a title humtu Herring chuan, "Ka career-a hnehna langsar ber a ni a, Frampton tan ṭawngṭai a, a chunga hmangaihna lantir vek turin ka duh che u a ni. Mipa diktak a ni a, a fan ka ni reng dawn bawk.

"Pathianin malsawm che rawh, dam takin i chhungte hnen chu i thleng dawn nia," tiin a hneh tak boxing legend chu twitter kaltlangin a thlah.