West Brom-in Tuchel-a Chelsea an sawp

Thomas Tuchel hnuaiah Chelsea-in hneh loh nei loin match 14 an kal a, Inrinni zan khan an record duhawm tak hi Stamford Bridge-ah tihtawp a ni. Blues record titawptute hi relegation zone-a awm West Brom an ni a, amaherawhchu Baggies enkawltu hi Sam Allardyce tih hriat a ṭha.

Chelsea hian Christian Pulisic hmangin goal an khung hmasa a, Thiago Silva hnawhchhuah a nih avangin player 10-in an khel thung. Baggies-in an tamna chu remchangah lain 5-2 in an sawp. West Brom tan Matheus Pereira leh Callum Robinson ten goal hnih ve ve an khung bakah Mbaye Diagne-a'n goal khat a khung ve bawk. Second half-ah Mason Mount-a'n goal khat khung ve bawk mah se Blues mualphona a hliah khuh zo lo.

Danglamna Red Card

Chelsea defender Thiago Silva-a'n minute ngana lekah yellow card a hmu a, Blues hi a tir lamah talbuai mah se minute 27-naah Pulisic-a'n goal a khung avangin an insiamṭhaah a ngaih theih. Marcos Alonso freekick petin goal ban a per hnuah American forward Pulisic hian a per let lehlam chu goal-ah a chantir.

Tuchel-a hote dinhmun ṭha mah se minute 29-naah Silva-a'n Okay Yokuslu a tlawh thlu a, yellow card vawi hnihna a hmu. Brazilian defender hi kum 36 leh ni 193 mi a ni a, Premier League bikah Chelsea player zinga red card hmu upa ber a ni.

Silva tel lohna Blues tlarhnung a pawp a, injury time minute hnihnaah keeper Sam Johnstone-a petchhuah chu Matheus Pereira-a'n um lutin a ti goal. Chelsea an talbuai a, Matt Phillips-a'n crossbar a pet per a, hemi hnu hian Pereira-a'n mawi zetin goal hnihna a khung. Injury time-ah Baggies-in goal hnih an khung.

Second half ṭantirhah Chelsea-in siphurh sutna remchang nei mah se an sut tak si loh avangin West Brom-in goal an khung belh ta zawk. Baggies tan substitute Robinson-a'n minute 63-naah goal mawi bik a khung a, minute 68-naah Mbaye Diagne-a'n a khung leh bawk.

Blues tan Mason Mount-a'n minute 71-naah a khung a, Timo Werner-a siamsak a ni. Amaherawhchu injury time-ah Robinson-a'n Baggies goal ngana a khung a, Tuchel-a hote an mualah dawl zawrin an zawr.

Tuchel a lungawi lo

International break-a zawh hian club lianin harsatna an tawk ṭhin. Thomas Tuchel pawhin first eleven-a a chhawr ngun Mason Mount leh Kai Havertz te bench-ah dah a, minute nei tam lo zawkte bul ṭanna hun a pe. Amaherawhchu rilru lamah an inpeih lohna a lang a, Thiago Silva chetsual chhanah pawh a ngaih theih.

Brazilian defender Thiago Silva hi inhliam vangin thla hnih chhung a chawl a, ngai a la awh lo. German striker Timo Werner pawhin inrintawkna a nei lo. Werner hian North Macedonia nen an inkhelh ṭumin hnai tak aṭangin a hlah a, Mount-a khung tur a siamsak pawh hi a inrintawk loh vanga a ṭhianpa pe ta zawk niin a lang.

Blues manager Tuchel chuan, "Second half-ah khatiang kha a thleng ang tih ka suangtuah pha lo. Kan theihna thlir hian goal nga kan chhuah theihna chhan hi ka hrethiam lo. Kan vai thiam loh a ni a, keipawh ka tel a ni. Goal kan khung hmasa chungin kan talbuai a, goal kan venhim dan a dik lo a ni," tiin a sawi. Chelsea hian April 7, Nilaini zanah FC Porto nen Champions League quarterfinal an khel dawn a, insiamṭhat ran an mamawh ang.

Beiseina a la awm

West Brom-in Chelsea lakah point thum hlu tak an hlawhchhuah avangin match 30 aṭangin point 21 an hmu a, Premier League beiseina a nung thar. Baggies hian an chunga awm Fulham point ngain an pha lo a, a him china awm Newcastle United point sarihin an la pha lo. Big Sam hian Premier League aṭangin a naute a la relegate pui ngai lo a, tun season-ah hian thilmak a thlentir thei ang em? tih zawhna chu hriat a châkawm ta hle.

Baggies manager Sam Allardyce chuan, "Kan chak vang chauhin kan lawm lo a, kan khelhdan phung vangin ka lawm tel. Goal hmaa kan hriam tawk loh avangin tun dinhmun ṭha loah kan awm lo a, Chelsea nen erawh kan neih loh ṭhin kha kan nei let leh ta. Blues hmachhawn tur hian kar thum inzirna hun ka nei a, ka hmang ṭha a ni," tiin an khelh danah a lawm hle.

Big Sam hi Premier League-a club hrang pathum enkawl chunga Stamford Bridge-a hnehna chang vek thei awmchhun a ni. English manager hian Chelsea khelmualah hian Bolton Wanderers, Crystal Palace leh West Brom te hnehna a lo chanpui tawh a ni.