Bayern-in Leipzig an hneh

Bundesliga table chung pahnih inkhelah Bayern Munich-in RB Leipzig 1-0 in an hneh. Red Bull Arena-ah hian goal awmchhun hi minute 38-naah Leon Goretzka-a'n a khung a, Bavarians-in point sarihin hma an hruai fal leh ta.

Inrinni zan Bundesliga inkhel dangah Borussia Dortmund-in an mualah Eintracht Frankfurt 2-1 in an hneh lo a, Champions League khelh a harsa sawt dawn. Dortmund hian palinaa awm Frankfurt hi point sarihin an pha lo.

Bayern nge nge

Bayern Munich-in an goal khung khawl Robert Lewandowski an chhawr thei lo a, Polish striker aiah Eric Maxim Choupo-Moting a lut. Germany coach Joachim Low-a'n Thomas Muller leh Serge Gnabry te a thlan kawp theih laiin Muller a hnawl a, Hansi Flick erawhin Gnabry hi bench-ah dahin tawnhriat nei ṭha zawk Muller bul a ṭantir.

Minute 38-naah Muller hian box chhungah rilru fim takin Goretzka tan a siamsak a, Germany international Goretzka hian goal pawimawh bik a khung. Bavarians hian hnehna chang mah se chak turin keeper Manuel Neuer puihna an mamawh.

Bayern captain Neuer hian Marcel Sabitzer goal khung tur chauh a dang lo a, tlarhnunga a awm hian team-ah danglamna a thlen. Defender pahnih Niklas Süle leh David Alaba te hun tam zawk khel ṭha mah se second half-ah erawh RB Leipzig tlarhma bil zarah goal an chhuah lo a, hnehna chang turin Bavarians an vannei tel.

Goal awmchhun khungtu Goretzka chuan, "Point 21 hlawhchhuah tur a la awm a, khelh tur a la tam. Chutihrualin tun ṭuma kan chak hi a pawimawh takzet a ni," tiin a sawi. Bayern-in Lewy awm lo an tuar a, Polish striker tel lo bawk hian April 7, Nilaini zanah fiahna hautak zawk an hmachhawn dawn. Hansi Flick-a hote hian nikum Champions League final-a an hneh PSG chu quarterfinal-ah an hmachawn dawn.

Dortmund an chesual

Borussia Dortmund player-ten media lamah thawm nei ring ṭhin mah se khelmual lamah thawm an nei ring tawk lo. Signal Iduna Park-ah Dortmund hian Eintrancht Frankfurt an mikhual a, inkhel thunun zawk mah se 2-1 in an chak lo.

Minute 11-naah Dortmund player Nico Schulz-a'n an lamah a ti lut a, Mats Hummels hmangin mualneitu hian an siphurh hi minute 44-naah an sut. Real Madrid, Barcelona leh Man City te nena sawi zawm Erling Haaland chuan minute 90 chhung khel mah se goal a khung thei lo a, Eintrancht Frankfurt tan Andre Silva-a'n minute 87-naah chakna goal a khung.