Miami Open champion Barty

Hmeichhe tennis world number 1 Ashleigh Barty chuan Miami Open nomawi a kawl lai a humhim, nimin zing final inkhelah Barty hian Bianca Andreescu chu straight set-in a hneh.

Hard Rock Stadium-a inkhelah Australian nula Barty zawkin bul a ṭan fuh a, harsa lutuk loin set khatna pawh a la. Set hnihna an khelh laiin 4-0 in hma a hruai fal chhunzawm laiin a khingpui hi ke rek dinglam hliam vangin a inhnukdawk.

Andreescu hian 2019 khan US Open title a la a, 2020 season chawhma lam kha khup hliam vangin a khel thei lo zui. Hri leng vangin kum khat deuhthaw a chawl leh, beiseina sang tak nen lo kir mah se hliam a nei leh ta.

Barty erawh hri leng vangin chawl rei mah se a thiam dan a la pangngai reng, inkharkhip hnua ram danga a inkhelh lehna hmasa berah harsa lutuk loin a nomawi a humhim thei.

Kum 24 mi Barty chuan, "Hun rei tak inkhel lo mah ila inah ka training reng a, tournament khelh loh vangin ka inthlahdah chuang lo. Inrintawkna ka nei sang, team member ten min rintawk bawk avangin harsatna ka nei lo," tiin a sawi.

May thla hian French Open khelh a ni leh dawn a, clay cout inelna lian inbuatsaih nan hian Madrid, Stuttgart leh Rome khawpuiah clay court tournament a khelh chhunzawm theih a rinawm.