Liverpool an tho leh ta - nomawi a hnai

Watford laka an tlawm hnua an league match hmasa berah Liverpool an tlawm nawn duh tawh lo. Anfield-ah an mikhual Bournemouth chu 2-1 in an hneh a, Premier League nomawi chawi turin match kuaah vawi thum chak chauh an mamawh ta. 

Minute kuana leka Callum Wilson-a goal avangin Liverpool fan-te hlauthawng hman mah se Reds dik tak an inlar leh ta a, Mohamed Salah leh Sadio Mane goal hmangin 2-1 in an chak. Liverpool hian Anfield-ah league match 22 chhung chu a zawnin hnehna an chang ta a, English top flight football-a mahni muala chak zawn rei ber record Reds vekin Bill Shankly hnuaia 1972-a an lo siam tawh chu an khum! Reds manager Jurgen Klopp chuan, "Record duhawm tak a ni a, mahse zanin kan inkhelin min zirtir chu theihtawp chhuah zel kan ngai tih hi a ni," a ti. 

Liverpool hian inelna hrang hranga an match hnuhnung paliah vawi khat chiah chak an nei. Invincibles champion nih an beiseina chu Watford lakah a thamral a, FA Cup aṭanga Chelsea-in an petchhuah avangin treble champion beiseina a bo bawk. 

Cherries an mikhual hma lawkin goalkeeper chhuanvawr Alisson inhliam thu an hre zui. Reds tan tun season-a an hun thim ber ang hiala chhal ngam a ni. Anfield-ah an inkhel ta ngei a, goal an chhuah zui. Wilson chuan Anfield thawm bengchheng beng daiin goal hmahruai a khung a, Chelsea nena sawizawm striker hian Joe Gomez-a nam thlu hmasa niin lang mah se video assistant referee-in goal-ah a ngai.

Liverpool fan-ten tlawm nawn an duh lo a, an hlauthawng - an mamawh chhanna Salah a lo lang a, Egyptian forward hian Mane-a siamsak chu minute 25-naah goal-ah a chantir. Liverpool tan league match 100-a goal 70 a khungna a ni. 

Premier League-ah Salah anga club pakhat tana an match hmasa 100-a goal 70 khung tling thei hi Alan Shearer (Blackburn Rovers, 79 goals) chiah a awm a, Liverpool player lo ni tawh zingah Fernando Torres (63) chuan a hnaih ber. Minute 33-naah Mane chuan tlawm an duh tawh lo tih pholangin Virgil van Dijk-a pass duhawm chu goal-ah a chantir zui a, James Milner-a'n goal line aṭanga Ryan Fraser-a shot a petchhuah avanga him chungin Reds an chak. 

Liverpool tan Andy Robertson chu hliam vangin inlan thei lo mahse ngaihtuahawm a ni lo a, captain Jordan Henderson chuan club training a zawm ve leh ta bawk - player pahnih hian Nilaini zan Champions League last 16 second leg an khel thei ang. 

Chelsea nen an inkhelh hmaa training-a inhliam Alisson erawh first leg-a 1-0 a an ngam loh Atletico Madrid lakah a inlan thei dawn lo a, March 16-a Merseyside derby-ah a inlan theih a beiseiawm chiah lo bawk. Klopp chuan, "Alisson hi a tirah hliam tenau emaw kan ti a, mahse an enfiah hnuah rin ang a lo ni si lo a ni," tiin a goalkeeper chungchang a sawi.