Ronaldo leh Juventus pet chhuaktu Ajax

European champion Real Madrid an pet chhuak a, tunah Cristiano Ronaldo awmna Juventus an hneh leh ta! Football khawvel barakhaih mektu chu tu dang ni loin Ajax an ni. Dutch club hian 1997 hnua a vawi khat nan Champions League semifinal an inpet kai leh ta.

Thawhlehni zan quarterfinal second leg inkhelah Ajax hian 2-1 in hnehna an chang, Johan Cruyff Arena-a an intawn hmasakah 1-1 a an inhnehtawk avangin inkhel pahnih belhkhawmah 3-2 in an chungnung a ni.

Erik ten Hag-a enkawl Ajax hian semifinal-ah Manchester City leh Tottenham inkhela chak zawk an hmachhawn leh dawn a, Dutch League leh Cup-ah champion beiseina an neih ve ve avangin season duhawm an hmang mek.

Phuba chu

Ajax-in UCL semifinal an luh hnuhnun ber chu 1997 kha a ni a, an hneh loh chu Juventus an ni - hemi ṭum hian Danny Blind, Marc Overmars, Edwin van der Sar bakah De Boer te unau Frank leh Ronald te chu Dutch team tana player pawimawh an ni.

Season 21 a liam hnuah club pahnih intawng lehin, Danny Blind-a fapa Daley Blind chu Ajax tlarhnung dawltu a ni tawh a, a bula ding Matthijs de Ligt chu Juve nen an intawn hnuhnung ṭum hian a la piang lo - tun ṭumah erawh kum 19 mi De Ligt hian chakna goal a khung.

Juventus Stadium-a inkhelah Ronaldo-a'n corner aṭanga ball rawn kal chu chiang zeta tauh lutin a club hma a hruai pui. Mahse, mikhual tan Hakim Ziyech-a shot lo la pengtu Donny van de Beek-a'n a sut bakah, second half-ah De Ligt chuan Juve player pahnih kara awm chungin theihnghilh ngai tawh loh tur goal pawimawh a tauh lut.

A thlawn mai maw...

Juventus hian Serie A an thunun a, a zawna vawi riat champion turin point khat bak an mamawh tawh lo. League-ah ropui viau mah se tun hnai season li chhungin Champions League final-ah vawi hnih an tlawm a, Turin club ropuina hi 'a famkim lo' deuh tia sawi theih a ni.

Italian champion hian UCL nomawi a ken tel beiseiin a hun laia kum 33 mi Ronaldo chu pound maktaduai 99.2 in an lalut. Real Madrid forward hi a zawna vawi thum champion hlim a ni a, last 16-a Atletico Madrid an hneh ṭuma a chet dan avangin beiseina pawh a sang zual.

Mahse, Ronaldo awm hnuah Massimiliano Allegri naute hian Coppa Italia nomawi an kawl lai an hloh tawh a, league champion ni mah se European club inelna sang berah semifinal an thlen phak loh avangin Ronaldo an lak chhan a hlawhchham.

Lunglawm a kim

Ajax captain Matthijs de Ligt chuan, "Thil pangngai a ni lo, a makin a danglam em em a, thu a sawifiah dan ka thiam lo," tiin a zawna Real Madrid leh Juventus an hneh dan zinkawng chanchin a sawi.

Netherlands international defender De Ligt hi a kum la naupang viau mah se khelmual chhungah a puitling tawh a, hmabak êng tak nei a nih bawk avangin nipui bazarah European club lian dang ten an inchuhrawn a nih pawhin a mak lo ang.

Juve manager Allegri chuan, "Hnehna chan phu zawk leh tlang tura khel chhuak chu Ajax kha an ni. Champions League semifinal an lut a, an kalkawng hi a thui tawk hle, tihpalh a ni lo. Player hmabak êng tak tak nei awmkhawmna Ajax team ngei mai an ni e," tiin a sawi.