Durtlang North an chak nghal

Thawhlehni zan khan Suzuki Gixxer Pro Volleyball League chu Chawnpui Sports Centre-ah khelh ṭan a ni a, season hmasa semifinalist Durtlang North chuan inlan thar Chanmari West chu 15-12, 15-13, 15-7, 15-11, 15-11 a hnehin bul an ṭan fuh hle.

Durtlang North tan hian Rajasthan spiker Rahul Katarya-a'n vawi 10 vaw tla nghalin a langsar a, mahse tihsual vawi li a nei. RS Traders Player of the Night atan thlan tak Lalbiakmuana'n point 15 thawk chhuakin player langsar ber a ni a, ani hi season hmasa ang bawkin a hmuhnawm leh dawn.

Chanmari West tan state pawn player Abimanyu Ray a hmuhnawm. Railways player hian vawi 22 vaw tla mah se point 15 a hloh a, player dangin an thlawp ṭha tawk lo bawk. Tualchhung player Vanlalpeka, Lalruatpuia leh Hrangtinkhuma te an khel chhe lo a, hnehna chang turin hma an sawn erawh a ṭul thung.

Tualchhung volleyball inelna sang berah hian set nga (point 15 game) an khel a, set khat an lak hian point khat zel an hmu. A tawpah a sang paliin semifinal an khel ang, match tinah hian RS Traders Player of the Night thlan zel a ni.

April 20, Inrinni zan hian a hmun ngaiah inkhel a awm leh dawn, champion lai Hunthar leh tualchhung team ṭha TNT, Muanna Veng an intawng ang. Team pahnih hi PVL bakah Mizoram Volleyball Association hnuaia inelna hrang hranga tawnhriat nei ṭha an nih avangin inkhel a hmuhnawm dawn.