Amir Khan - Entawn tur a hnutchhiah kha

A hming chu Amir Khan a ni a, tuna a chanchin kan ziah tur erawh Bollywood star ni loin British boxer a ni a, Asian boxer tam tak tana beiseina siamsaktu a ni.

British boxer hian Pathianni zing dar 8:30-ah ngam loh la nei lo Terence Crawford a hmachhawn dawn a, Madison Square Garden, New York-a fight thlen hun hi khawvelin a nghakhlel. Amir Khan chuan, "Hnehna ka chang a nih chuan ka thawnthu chu ropui taka ziah a ni ang a, he infiamna khawvel hi legend nichungin ka mangṭha theih phah ang," a ti.

Kum 32 mi boxer hian hriat loh a nei - Crawford hi hneh kher lo pawh ni se sulhnu ropui tak a hnutchhiah tawh sa a, midang tam tak tan beiseina siamsaktu a lo ni tawh.

Hriat loh val

Kum 2004 Olympic khan Great Britain boxer awmchhun ni chungin Amir Khan-a'n inelna a hmachhawn a, lightweight final a thleng.

Amir hian Cuban boxer ropui Mario Kindelan ngam lo mah se silver erawh a dawng ta tho a, May 2005 khan amateur boxer zinga ropui ber pawla chhal Mario hi a hneh let ngat bawk.

Bolton-a piang, Pakistani thisen kai Amir hian Great Britain tana silver a hlawhchhuah ṭum hian a ropuizia a la hre mai lo - UK leilung a rah chiahin hrilhfiahin a awm.

Amir chuan, "Chanchinbu phek hmaah ka thlalak a chuang a, mipuiin autograph duhin min dil bawk. Ka tan chuan thil thleng zawng zawng kha a thar vek a ni a, awih a harsa zawk hial a ni," a ti.

Ka Pu, kan zui che

Asian mi, Britain-a selianin Great Britian tan Olympic-ah medal a hlawh chhuak a, chu thawnthu ngaihnawm leh ropui chuan amah ang thoa Asian British-te thinlungah Amir ang nih châkna a tuh. Chung zingah chuan hetih hunlaia kum 11 mi Qais Ashfaq a tel. Leeds khaw naupang hi tunah chuan kum 26 mi niin professional boxer a ni tawh a, fight a hmachhawn vawi ngaah a la tlawm lo.

Ashfaq chuan, "Khatihlai khan gym-ah ka awm a, ka coach chuan Amir leh Olympian dang thlalak awmna chanchinbu chu a keu a, 'He nau hi Bolton ami a ni a, heta ṭanga darkar khat kal vel lek a ni. A theih chu engah nge i theih loh bik ang?' tiin min zawt a ni," a ti.

Vawi sarih fight a hmachhawn tawha la chak vek London boxer Hamzah Sheeraz chuan, "Amir hi Asian naupang tam takin boxing an luhchilh chhan a ni," a ti a, Amir Khan hnathawh a hai lo.

Zinkawng namai lo

Kum 32 mi Khan hi a fight vawi 38 nana inpuahchah mek a ni a, hnehna a chang a nih chuan WBO world welterweight champion a ni nghal bawk ang.

Mahse, hetiang taka mi hriat hlawh turte, inhnek an ngaihven rawn luai luai hlawh chhuak turte hian Amir Khan a zinkawng a awlsam lo. Beidawnnain zan rei tak a men tir chang pawh a awm fo. Professional boxing a luhchilh tirh khan Amir hi a fight hmasa 18-ah ngawt a chak zawn a, mahse kum 2008 khan rin loh takin Colombian boxer Breidis Prescott chuan first round-ah a knockout.

Khan chuan, "Tlawmna hrehawm tak a ni. Media zawng zawngin min sawisel a, mipuiin min hnuchhawn bawk. Sawiselna ka tawh zawng zawng kha a nasa em em a, world champion ka nih ngai loh tur thu thlengin an sawi a ni," a ti.

'Beidawnna' lo kiang rawh

British media chak zia khawvelin a hai lo. An sawisel tawh an dim ngai lo a, an fak duh lah an phu loh khawpin an fak emaw tih mai tur a ni. Mahse, sawiselna leh diriamna zawng zawng chu Amir Khan knockout turin an tling tawk lo.

Vawi 37 fight a hmachhawn tawha vawi 20 ngawt a khingpuite knockout tu hian a tlawmna hmasa ber a hmuh hnua a fight hmasa berah Oisin Fagan hnehin WBA International lightweight title a hlawh nghal. Kum khat pawh a liam hman lo, Khan-a hian Andreas Kotelnik hneh zuiin WBA world super-lightweight title a hlawh chhuak leh a, amah sawiseltute kha amah faktu an ni leh ta vek.

Amir chuan, "Min sawiselnate chu tlawm nan ka hmang duh lo. Min diriamna avanga min tluk tir nia an ngai a nih chuan ka tho leh a, chona phurawm zawk ka hmachhawn leh ṭhin," a ti!

Nang mi huaisen

Amir Khan ropuina an sawi fo ṭhin pakhat chu a rilru huaisen hi a ni. Fighter ṭhenkhat angin a record ti ṭha turin hmachhawn awlsam tur zawka ngaih a thlang ngai lo a, a ṭha ber zel hmachhawn a duh.

British boxer hian Terence Crawford hmachhawn tura thutlukna a siam hma pawh hian duhthlan tur dang leh awlsam zawka ngaih Kell Brook a nei reng a, mahse Terence a thlang miau si! Kum 31 mi US boxer Terence hi vawi 34 fight a hmachhawn tawhah a la tlawm ngai lo a, division pathum lightweight, super-lightweight leh welterweight title kawl lai a ni - WBO world welterweight title an inchuh ang.

Amir khan hi kum 2016-a Mexican middleweight star Saul 'Canelo' Alvarez hmachhawn tura division hnih zuang 'sang' duh kha a ni a, a rilru huaisen leh paukhauh zia ringawt pawh hi sawi tham a tling.

Amir leh ropuina

Kum 17 mi lek nichungin Olympic-ah silver medal a hlawh chhuak thei a, kum 25 mi a nihin world champion kawnghren pahnih a rualin a hreng tawh a, Amir-a sulhnu hi sawi nep luih theih a ni lo. London boxer Sheeraz chuan, "Ka tan kawng hawngtu a ni," tiin Amir Khan a fak a, Leeds fighter Ashfaq chuan, "Mi pakhat tal pawh ka hnung zui tura ka hmin ve thei a nih chuan hna ropui tak thawk ka ni ang," a ti.

Khan chuan, "Boxing hi ka hmangaih a, ka nun engkim thlaktu a nih avangin ka chawlhsan hunah pawh ka hming hi miin hre reng se ka duh. Fighter hmabak eng tak nei Qais leh Hamzah-te thinlung ka hneh dan ka ngaihtuah chuan thil ṭha engemaw tak chu ka ti ve niah ka inngai a, kum naupang zawkte tan career ka siam sak vein ka hria a ni," a ti.

Ni e, Amir, Terence Crawford hneh lo pawh ni la, ring piah lamah mi tam tak thinlung hnehtu i nih avangin boxing khawvelah i hming a dai tawh lo ang - Entawn tur min hnutchhiah miau a.