Napoli mualah Ramsey awmna Arsenal Tlang turin Chelsea dinhmun a ṭha tawk

Arsenal midfielder Aaron Ramsey-a'n season tharah Juventus jersey a ha tawh dawn a, a club thar tana a elpui tur Na­poli chu zanin dar 12:30 hian Italy ram leilungah Arsenal pla­yer nichungin a hmachhawn dawn.

Zanin hian Europa League quarterfinal second leg khelh tur a ni a, Chelsea chuan Stam­ford Bridge-ah Slavia Prague an mikhual dawn bawk. Blues hian khualmualah 1-0 a hnehna an chan tawh avangin tlang tur­in an dinhmun a ṭha tawh hle.

Italy lamah

Arsenal-in an mikhual Napoli 2-0 a an hneh theih avangin an dinhmun a ṭha viau a, chutihrualin khualmualah result an neih ṭhat loh ṭhin em avangin tlang chiang anga sawi ngawt theih an la ni lo - an khingpui tur Carlo Ancelotti naute hi an khelh fuh ni chuan goal khung thiam tak an ni.

Stadio San Paolo-a Arsenal lenluh hnuhnung ber chu 2013-14 season Champions League group stage kha niin 2-0 in an tlawm, fimkhur a ngai dawn hle. Season hmasa khan khualmualah AC Milan si hnih faiin an hneh a, hei vang hian Italy ram hi an tan hmun ralṭi chu a ni bik lo.

Italy-ah Arsenal an zin dawn tih ruala chanchin lang­sar nghal chu Ramsey a ni. Welsh international hian kum 11 chhung a chamchilh tawh English club hi nipuiah a chhuahsan dawn. Italian champion Juve nen kar khata £400,000 hlawh turin season li chhung atan an inrem tawh.

Kum 28 mi Ramsey a chhuak dawn tih a chian avangin Unai Emery-a'n player dang tan hmun a siamsak hnem phah. Mahse, match khelh tur a tam a, midfielder Ramsey thiamna thup theih a ni lo - inkhel bul a ṭan hnuhnung parukah goal thum a khung.

Arsenal player awm lai zinga senior ber Ramsey chuan, "Tunah hian tlang turin din­hmun ṭha takah kan awm tawh, huaisen taka kan ṭangrual a nih phawt chuan semifinal kan luh ka ring. Mahse, kan khingpui tur hi Serie A-a pahnihna ni lai team ṭha tak an ni. An khelmuala an inkhel hnuhnung ho kha kan thlirlet a nih chuan a hautak hle ang," a ti.

Gunners manager Emery pawhin Ramsey chungchang sawiin, "Juventus tan thutiam a ziak tawh chunga Arsenal tana inkhelh kha a harsa mai thei. Mahse, player puitling tak a ni a, sang tak min thlenpui a duh vangin a thawkrim em em a, training-na hmuna a ṭhahnem ngaih dan phei chu beisei phak bak a ni.

"Arsenal ṭantute tan thil hriatreng tur hnutchhiah ngei a duh a, keini lam pawhin a hun hnuhnungah hian a ropui thei ang bera thlah kan duh," a ti. Sevilla a enkawl laia Europa League nomawi vawi thum chawi tawh hian Ramsey a dahsang thiam hle.

Rinkai Chelsea

Czech Republic khawpuiah Chelsea-in defender Marcos Alonso goal khat hmangin Prague an hneh tawh a, tlang tur chuan goal chhuah loh a tawk. An chesual viau a nih ngawt loh chuan Maurizio Sarri naute hi semifinal-ah kan hmuh ngei a rinawm.

Kum 2013 Europa League champion Chelsea hian an match hnuhnung berah Liverpool 2-0 in an ngam lo, Reds laka an tlawm avang hian Premier League table-ah palina chin nih phak beiseina a tlahniam tawh hle.

League-ah che fuh thei lo mah se Blues inhnemna chu Europa League-a an che ṭha hi a ni. European football-ah hian match 14 chhung chu hneh loh nei loin an kaltluang tawh. Sarri nauten inrintawkna an nei sang hi a mak lo, chutihrualin an khingpui tur hi tun hnai season thum chhunga Czech champion vawi hnih nih tum lai an nih avangin chetsual theih chu a ni ve tho.

Italian manager Sarri chuan, "Prague hi an chanchin ka zirchiang a, khualmualah an hlauhawm hle tih kan hria, chuvangin zanin hi a hautak dawn hle. Kan tlang theihna tur a nih chuan kan neih ṭhat zawng zawng kan hmang mai tur a ni," a ti.

Liverpool an hneh loh ṭum­a inhliam defender Antonio Rudi­ger dinhmun a la chiang lo a, amah thlaktu kum 23 mi Andreas Christensen erawh a inlan thei ngei tura ngaih a ni thung. League lama chhawr rim loh Olivier Giroud, Pedro leh Callum Hudson-Odoi te an pawimawh lehin a rinawm.

Inkhel dang

Benfica chuan 4-2 a hma hruai chungin Germany an pan dawn. Bundesliga club Eintracht Frankfurt tan tho chhuak leh tur chuan goal hnih tal khung a ngai dawn. Lisbon-a an inkhelh ṭumin kum 19 mi Joao Felix-a'n goal thum a khung a, Portuguese player zinga European football-a hattrick siam thei naupang ber hi en bik tham a ni ang.

La Liga club pahnih inkhel­ah Valencia chuan Villarreal 3-1 in an ngam tawh. Valencia hi anmahni muala khel tur an ni tawh bawk avangin an tlang ngei a rinawm. Los Ches (Valencia sawina) hi European competition-ah first leg-a hma an hruai tawh chuan vawi 31 zinga ṭum 29-ah an tlang tawh ṭhin a ni.

Europa League Quarterfinal Second Leg
Zanin Inkhel Tur
Napoli 12:30 AM Arsenal (0-2)
Valencia 12:30 AM Villarreal (3-1)
Eintracht Frankfurt 12:30 AM Benfica (2-4)
Chelsea 12:30 AM Slavia Prague (1-0)