Paul Scholes thubuai an siamsak

Manchester United leh England midfielder hlui Paul Scholes chu pawisa thapna lamah a lo in­hnam­hnawih avangin FA chuan thubuai an siamsak a, April 26 thleng insawifiahna hun pek a ni.

Tun season-a ni 31 chhung Oldham Athletic enkawl hna thawk zuaitu Scholes hian August 17, 2015 leh January 12, 2019 inkar khan football match hrang hrangah vawi 140 ngawt pawisa a thap a, hei hi FA chuan sawifiah turin an ti.

Kum 44 mi Scholes hian football khel tawh lo mah se non-league club Salford City-ah 10% neitu nihna a neih avangin pawisa inthapnaah hian a inhman a thiang lo a, thu­buai hi siamsak a ni ta a ni.