United-in MESSI thiamzia an hmu
Manchester United-in thilmak thlentir beiseiin Nou Camp-ah an lenglut a, an hmuh chu Lionel Messi thiamzia a ni a, thil thar a awm lo.
Thawhlehni zan Champions League semifinal second leg inkhelah Barcelona chuan Messi goal hnih leh Philippe Coutinho te hmangin United 3-0 in an hneh a, Old Trafford-a an chak tawhna nen aggregate-in 4-0 in an chak.
Barca tana 'trial'?
Europe club-te tana inelna sang ber Champions League hnuhnung pangaah Spanish club an champion a, tun ṭumah pawh Catalan club hi champion tura rinkai ber an ni.
Spanish club chet ṭhatna chhan pakhat chu an mit it zawng an hlah meuh lo hi a ni. German club Bayern Munich-in an rama an elpuite player an chhuhsak ang maiin Real leh Barca hi chuan Europe-a anmahni elpha thei tur player an laksak fo. Chung zinga langsar chu Cristiano Ronaldo (Manchester United), Toni Kroos (Bayern Munich) bakah Luis Suarez leh Coutinho (Liverpool) te an ni.
Tun ṭuma an inkhelh hma pawh hian Catalan club hian United chhul chhuak Marcus Rashford chu pound maktaduai 100 zetin an ngam tih chu thuthang lian ber zinga mi a ni a, English forward hian trial a hmachhawn tia ngai tawk an awm a nih pawhin a awm lo hran lo.
Ṭan phatah Rashford-a'n a theihna a pholang a, United jersey no. 10 hian Barca 'offside trap' bumin ṭha takin a tlan lut a, crossbar a pet per nghal. English club beiseina a nung a, Catalan club ṭantute an hlauthawng.
Hlau suh u, 'Messi' a awm
Barcelona ṭantuten an chhut chiang a nih chuan Sir Alex Ferguson hnuaia Manchester United vanglai pawhin Messi vangin Champions League final-ah Red Devils hi ṭum hnih an hneh tawh a, tun ṭumah pawh Messi an la kawl reng avangin Ole Gunnar Solskjaer kaihhruai United hmaa zam tur an ni lo.
Minute 16-naah Messi a rawn inlar a, United captain Ashley Young tihsual nang fuhin goal khung turin a khalh lut a, box pawn aṭangin a thiam dan takin goal kilah a ke veilamin a pet goal. Messi goal 'cool' leh nalh zet hian Barca dinhmun a ti ṭha a, minute li hnuah Argentine forward hian a ke dinglamin a khung lehnghal. Goal hnihna luh chhan hi David de Gea tihsual ni mah se goal mawi leh chetsual vanga goal hlutna a inan reng avangin United comeback beiseina chu minute 20-naah a tawp fel.
An inthlau hret
Barca-in goal an khung hma hian Ivan Rakitic chu referee-in penalty pe zet mah se VAR hmanga hnuhkir a ni a, team pahnih theihna a inthlauh deuh avangin United-in semifinal thlen theihna khawp vanneihna an nei lo.
Rinlawk ang ngeiin Barcelona-in ball an chang tam a, chutihrualin United-in goal an chhuah hma avangin bet reng thei dinhmunah an ding lo a, Catalan club ball possession chu 66% a ni pha tho a, Paris St Germain-in United laka an ball possession 72% erawh an pha lo.
Barcelona-in Philippe Coutinho hmangin minute 61-naah an khung belh a, Liverpool forward hlui goal khung dan hi a tih fo tawh ṭhin dan a ni a, he goal mawi hi Catalan club chungnung zia lantirtu a ni.
Kum 26 mi Coutinho hian goal a khung zawh hian United ṭantu lam a hawi a, a kutin a beng chu a hnawh ve ve. Season laihawla United nena sawi zawm Brazilian forward hian Old Trafford lam a pan dawn lo tiin a ngaih theih a, a chet dan hi Liverpool ṭantute tan chuan hmuh a nuam khawp ang.
UEFA Champions League
Quarterfinal
First leg
April 10, Nilaini Zan
Ajax 1 - 1 Juventus
AJA : David Neres 46'; Cristiano Ronaldo 45'
Manchester United 0 - 1 Barcelona
BAR : Luke Shaw 12' (OG)
Second Leg
April 16, Thawhlehni Zan
Juventus 1 - 2 Ajax
JUV : Cristiano Ronaldo 28'
AJA : Donny van de Beek 34'; Matthijs de Ligt 67'
Agg-ah Ajax 3-2 in an chak
Barcelona 3 - 0 Manchester United
BAR : Lionel Messi 16', 20'; Philippe Coutinho 61'
Agg-ah Barcelona 4-0 in an chak
Semifinal
Barcelona Vs Liverpool/FC Porto
Ajax Vs Manchester City/Tottenham